英超丨賽後文章 : 熱刺新死球教練打造進攻武器 李城入靚波難逃大敗 老孫順勢戴帽 (熱刺 6-2 李斯特城) 精選

英超第七輪比賽，熱刺主場大炒李斯特城 6-2，孫興慜後備上陣隨即開齋，兼且上演帽子戲法。
雙方陣容 :

🦊早段領先
比賽早段，熱刺輪换上陣嘅中堅山齊士犯規輸十二碼，泰利文斯操刀被羅利斯撲出。不過，有鑒於射球一刻，羅利斯未能至少一隻腳踩住門線，所以需要重射。泰利文斯第二次操刀選擇射同一方向，但力量同角度有明顯改進，似係反省過第一次射失嘅成果。

⚪️死球武器
落後嘅熱刺花費15分鐘，就憑兩個角球將比數反超。先有第8分鐘嘅右路角球，古路斯夫斯基開短角球同隊友配合後，引球推出大位引對方防線推前，再斬到遠處俾反方向插入禁區嘅哈利簡尼衝頂入網扳平。21分鐘，佩利錫角球助攻迪亞頂入，爭頂過程中兩側隊友嘅牽引令迪亞頂得更輕鬆。之後亦有一次罰球，山齊士頭槌被對方門將華特撲到後中楣，熱刺差少少半場入三個死球。今季新加盟嘅死球教練Gianni Vio，係意大利歐國盃冠軍班底一員，今場角球頭兩發兩中可見其影響力，相信熱刺嘅死球已成為一大進攻武器。🦊以金球迫和
李城無需應付歐洲賽之下，體能上有優勢，落後之下一度壓住熱刺，上半場佔據近六成控球率。不過陣地戰當中，進攻球員偏向左邊，右邊主要靠右閘卡斯坦尼一個人，牽扯同衝擊對方效果一般。41分鐘一次反擊，杜斯貝利賀爾左路以長傳轉移至右邊，卡斯坦尼凌空一控一橫傳助攻馬迪臣腳內擋逗射，皮球高飛曲墜入網仔，整個入球過程難道極高。完半場前馬迪臣插入右輔位攻門，威脅就大得多，只差羅里斯一關。上半場兩隊各二言和入更衣室。🦊大開殺戒
下半場開波不久，李城防中尼迪迪被賓坦古亞從後「打荷包」，賓坦古亞單刀直入助熱刺再次領先。李城向前壓迫搶攻，憑馬迪臣45度角傳中製造到達卡頭槌攻門，羅利斯飛身僅僅撲出。不過除此之外，李城就欠缺其他有效嘅招式，隊形壓前之下，就俾到熱刺有更多反擊空間。干地喺60分鐘前已連換三人補充體能，球隊得以大開殺戒。
⚪️順勢戴帽
後備上陣嘅孫興慜，隨即開齋兼且上演帽子戲法，左右腳遠射各一，加上一個反擊入球，表現可謂大放異彩。不過，今場未能代表老孫已回到最佳狀態，一來因為後備上陣有體能優勢，二來當時李城攻守已經失衡，老孫充分擁有入球空間同機會，入球順勢而來。不過肯定嘅係，今次戴帽會令其信心大增，小弟亦希望老孫繼續發光發亮。
🦊強差人意
至於李城方面，七戰一和六負排英超包尾，成績強差人意。若球隊財政狀況許可，羅渣士嘅帥位恐怕危危乎了。

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)