融會貫通 ! 曼聯成功演繹「垂直版tiki-taka 」 精選

坦克麾下嘅曼聯，喺英超頭兩場以控球踢法應戰，輸得慘烈。
訓練球隊以控球壓制對手，從來需要時間。然而，第三輪就要面對利物浦。坦克及其團隊果斷決定放棄控球在腳，更多以快攻／反撃侵襲對手，最終相隔四年再喺英超贏得雙紅會。雖說利記狀態不佳，但任何時候雙紅會都係重要嘅戰役，加上賽前坦克與球員一同罰跑、喺更衣室貼上評述員批評字句等行動，令呢場勝利足以成為球隊季初嘅轉捩點。

值得留意嘅係，坦克並冇全然放棄其概念，更可以話係同防反融會貫通，令眾將進攻處理得更游刃有餘。還記得之前講過坦克嘅戰術被譽為「垂直版tiki-taka 」(vertical tiki-taka)，曼聯球員好成功咁將呢個概念演繹出嚟，能夠以落力嘅無球跑動、節奏變化、位置互動、偶有嘅one-two/三角配合等等嘅元素，製造鋭利嘅快攻/反撃，效果超乎想像。面對體系成熟嘅利物浦以及正在崛起嘅阿仙奴，以one-two配合（攻入利記第一球）、艾歷臣般奴雙核連線（對阿記入嘅三球過程中都有），證明球隊快攻/反撃火力接近頂級。
不過，要面對嘅問題始終都要面對。當對方防守時將隊型收縮在後，快攻／反撃嘅空間同時機將會減少，到時就更考驗球員對其攻勢嘅把握。狀態好時固然問題唔大，如般奴面對修咸頓，能把握少有嘅快攻機會以一記「窩利」一箭定江山，不過狀態差，鋭利度同把握力下降時，恐怕只會老鼠拉龜。長遠而言，相信坦克及其團隊，都會訓練球隊由後場開始控制皮球，至於進度同效果，一於拭目以待。

希望大家多多支持！撳多幾個掣，俾多幾個鼓勵！(例如「訂閱」掣，同埋follow IG: @football_era_talking 觀看更多唔同嘅短文/資訊/睇波即時story分享)