踢法鮮明且充滿特點 利辛度馬天尼斯勢將精彩表現帶入夢劇院

阿根廷中堅利辛度馬天尼斯,踢法鮮明且充滿特點,今夏跟隨老細坦克加盟曼聯,齊齊為曼迷帶嚟唔少期待。

⚽️先發制人
馬天尼斯大局觀清晰,能掌握對手動向,小至身邊球員嘅移動方向同重心,大至隊形嘅流動。掌握對手嘅能力,結合自身嘅速度同靈活性,令馬天尼斯得以先發制人。佢嘅長處包括:向前掃蕩反搶、身高劣勢下「攝」贏身位/順勢撞開對方後爭頂、馬斯查蘭奴般準確嘅攔截等等⋯⋯

⚽️進攻板斧
馬天尼斯嘅大局觀,唔止有利於防守。掌握對手加上出色嘅「波底」,令佢用波瀟灑如堤亞高,成為球隊進攻嘅一道板斧。馬天尼斯熟悉後場組織同守轉攻,亦能喺中場「派牌」、長傳轉邊/攻擊對方防線身後空間、後上攻門甚至做到類似馬迪普引球上前嘅動作。

⚽️一樣踢法
去到曼聯,坦克致力注入其戰術概念。馬天尼斯喺坦克嘅體系裏面,已經從防中轉踢中堅。因此可以預計,馬天尼斯去到曼聯主要嘅位置同角色,會同上季效力阿積士時相似。不過,曼聯本身欠缺中後場派牌嘅好手,若馬天尼斯重操故業,相信有力喺防中位置彌補呢一點。

⚽️體能憂慮
眾所皆知,英超節奏快,對抗強度高,對球員體能要求比其他聯賽高。每當其他聯賽嘅人才轉戰英超,關於體能嘅擔憂都會隨之而來。喺英超長期作戰,積積埋埋嘅體能負荷同其他聯賽有一定差距。初到英超,相信坦克需要安排輪換,令馬天尼斯得以保持移動泛圍同速度,以支撐其進取嘅踢法,同時減低出現失誤嘅機會。

⚽️精彩表現
馬天尼斯繼續喺坦克麾下,喺熟悉嘅體系之中,相信未來表現值得大家期待。希望馬天尼斯順利適應曼市生活環境,亦同新隊友好好相處,開季後將以往精彩嘅表現帶入夢劇院。

歡迎支持本文合作夥伴 @unitedfans_hk !!
loading

留言


請按此登錄後留言。未成為會員? 立即註冊
    快捷鍵:←
    快捷鍵:→