英超球季開始前一周，先有社區盾揭開大戰序幕。利物浦喺皇權球場以3-1撃敗曼城。
雙方陣容 :
🔴⛵️對攻各有機會
利記曼城兩隊對決，向來都有節奏明快嘅時段，今場早段亦唔例外。兩隊對攻之中各有機會，沙拿右路接應法賓奴長傳，推過簡些路後僅僅射斜，幾分鐘後迪布尼半單刀射門僅被雲迪克閂到。
不過對於雙方而言，今場算係新球季第一場「嚟真」嘅比賽，體能狀態自然有待提升。大概第15分鐘開始，比賽節奏開始減慢，局勢以互相打陣地戰為主。
🔴闊度加魅力形成吉位
利記面對曼城密集時，充分利用到球場闊度。兩翼拉邊，加上堤亞高同阿諾精準嘅轉邊長傳，足以拉扯對方防線嘅企位同注意力。沙拿突破力強，對位嘅簡些路一人難以抵擋，或者因此基亞利殊會幫手包夾沙拿。沙拿以其「魅力」引來曼城左路兩人，為身後嘅阿諾製造到助攻或埋門嘅「吉位」。第14同21分鐘嘅兩次進攻，路線非常相似，同樣係由左至右，同樣係堤亞高長傳俾沙拿吸引包夾，然後再俾到阿諾，其後阿諾一次係斬俾羅拔臣頭鎚頂中網側，另一次就係入禁區一控一射省中艾基嘅入波。
⛵️強硬推進
曼城失波後嘗試增加壓迫，迪布尼同夏蘭特分別以強硬嘅推進製造機會。哥迪奧拿安排基亞利殊同馬列斯正選上陣，可能希望增加快攻反撃中引球推進嘅人手，而唔一定由迪布尼帶波上前。迪布尼插入禁區嘅衝撃力不容忽視，24分鐘嘅反擊，馬列斯放波俾迪布尼爆入小禁區右邊射中網側。幾分鐘後夏蘭特有如一頭狂牛，一邊推波一邊撞開羅拔臣再射門，被阿祖安撲出。
🔴利記都有密集防守
上半場中後段開始，利記減少前場壓迫並將隊形縮後，三位中場軒達臣、堤亞高同法賓奴防守緊密，中後場壓迫、搶截同補位頻率相當之高。加上雲迪克同馬迪普集中喺後場看管，利記大大限制到迪布尼同夏蘭特衝撃嘅空間，亦成功阻止夏蘭特得到皮球（夏蘭特今場踢足但只有16次觸球）。邊路方面，基亞利殊同馬列斯傾向內切，但受限於利記嘅密集防守，而身後嘅簡些路同獲加受沙拿同迪亞斯牽制。
⛵️進攻變化
曼城面對密集嘅困境，令小弟諗起史達寧同加比爾捷西斯，兩人過往為曼城帶來唔少進攻變化。如今兩位配合同竄擾嘅好手離隊之後，曼城縱橫交錯嘅進攻組織相信喺短期內會減少，直至兩位新兵夏蘭特同艾華利斯融入哥帥體系。
下半場曼城哥帥安排球隊踢得更加直接，其後亦安排科頓同艾華利斯入替兩翼。去到70分鐘，有氣有力嘅科頓從阿諾身邊插前接應迪布尼長傳射門，阿祖安封到但未接到，艾華利斯補中迫和。
🔴比賽關鍵
高普下半場安排新兵紐尼斯入替費明奴。同經常回後鋪橋搭路嘅費明奴唔同，紐尼斯主要負責喺前面衝鋒陷陣同支點策應。呢位烏拉圭王子入場不久，就有半單刀機會，但射門過唔到艾達臣塊面。紐尼斯唔止鋭利度高，佢嘅頭槌能力，加上沙拿兩次傳中，成為咗比賽關鍵。83分鐘，沙拿以非慣用嘅右腳傳中，紐尼斯頭槌頂斜幸而博到魯賓迪亞斯手球，沙拿操刀十二碼射入令利記再次領先。補時階段，沙拿喺大位斬到遠處，羅拔臣插入左輔位接應，頭槌二傳俾到紐尼斯跣頂入入網，利記最終以3-1 擊敗競爭對手曼城。
⛵️慢熱
今場利物浦狀態較好，而曼城一如以往地慢熱。相對過往嘅球季，曼城今季前線人腳變化較大。根據馬列斯、基亞利殊等隊友初到曼城嘅經驗，夏蘭特同艾華利斯融入話唔定需時一季半季，而喺夾慣夾熟嘅史達寧同耶蘇仔離隊之下，曼城今季進攻火力未必及得上收購夏蘭特時嘅期望。
🔴近乎全能
利記今場展現到長時間收縮防守嘅能力，雖然曼城狀態一般，但個人認為利記防守表現仍然具說服力。高普麾下嘅利記，先有熱血壓迫，再有控球組織嘅概念，如今主動放下控球權亦得。利記今季戰術運用上相信會更加靈活，球隊踢法近乎全能之下，有望再次挑戰各個冠軍。
請按此登錄後留言。未成為會員? 立即註冊