經典回憶丨南非世界盃氣氛濃厚而獨特 西班牙同巴塞有分別

今個夏天，暫時未見有太多關於世界盃嘅宣傳，世界盃推遲到季中11月舉行，氣氛似乎差咁少少。世界盃安排喺季中舉行，相比以前歐洲球季結束之後先踢，亦少咗一種「終極」嘅感覺。
如果要揀一屆氣氛濃厚嘅世界盃，小弟認為非12年前嘅南非世界盃莫屬。當屆唔止氣氛好，而且有唔少獨特之處令人難忘。南非世界盃係第一次，亦暫時係唯一一次喺非洲舉行。南非球迷經常會帶一件叫「嗚嗚祖拉」嘅吹奏樂器入球場，唔少外來球迷都會入鄉隨族。不過，球迷對嗚嗚祖拉發出嘅歡呼聲反應兩極。而受普羅大眾歡迎嘅，係主題曲《Wavin’ Flag》同《Waka-Waka》，兩首歌嘅傳唱度相當之高，時至今日，唔少ig reels都用呢兩首歌做背景音樂。年資有返咁上下，尤其有買波嘅球迷可能記得，有隻叫保羅嘅八爪魚估波百發百中，相信造福咗唔少球迷。

講起當年首奪冠軍嘅西班牙，相信大家會諗起巴塞隆拿同Tiki-taka，簡東拿甚至講話係巴塞贏世界盃。不過，10年嘅西班牙同地上最強嘅巴塞，其實有些少分別。西班牙擁有巴塞嘅控制力，足以長時間壓住對手，消耗其體能，同時避免同對方「硬碰硬」。不過，西班牙未表現到巴塞冠絕球壇嘅進攻火力，反而係歷屆最少入球（8球）嘅冠軍。存在呢個差異，唔係話因為西班牙欠缺火候，更似係因為相對穩陣嘅取態，以保持球權為主，猜傳到有空問先攻入去。話雖如此，當時西班牙仍不乏悅目嘅組織。

南非世界盃仲有好多元素值得一提，一篇文章嘅篇幅難以概括。作為球迷，希望年尾卡塔爾世界盃都一樣令人難忘。