英超丨賽後文章 : 阿仙奴既有速率亦細緻 C朗狀態好但好心做壞事? (阿仙奴 3-1 曼聯) 精選

英超爭四大戰，阿仙奴於酋長球場以3-1擊敗曼聯，連贏兩場大戰。
雙方陣容 :

今場兩隊同樣以4231陣型應戰，互相壓迫之下，比賽節奏頗快。比賽第3分鐘，華拉尼同泰利斯似乎尚未入局，兩人面對傳中球先後解圍失敗踢空氣，導致曼聯早早落後。
曼聯回防時只有兩位中場保護禁區頂，而其中一個係移動速度較慢嘅馬迪。阿仙奴進攻組織既有速率亦係細緻，得以於中路滲入禁區，製造尼基迪亞兩次機會。一次被迪基亞力挽狂瀾救出，另一次沙卡內切擺脫泰利斯，牽引了馬迪補位，令通往尼基迪亞嘅傳球路線出現，今次尼基迪亞成功射破迪基亞十指關。雖然入球越位在先，但從VAR可見喺組織過程中泰利斯於禁區內從後侵犯沙卡，阿仙奴由沙卡操刀射入十二碼，32分鐘領先2-0。阿仙奴雖然以同一陣型面對曼聯，回防時同樣只有兩位中場保護禁區頂，但曼聯組織滲透力未及對方，阿仙奴回防後，曼聯未能從中路滲入。

曼聯今場所展現嘅精神面貌比上場雙紅會有所改善，球隊壓迫力可以，曾於前場搶到機會，可惜般奴狀態一般未能把握。C朗經歷喪子之痛後回歸正選，對比賽嘅投入程度不減，表現專業。C朗身體經過休息後，狀態良好，其支點串連多次為球隊進攻鋪橋搭路，製造了艾蘭加半單刀、達洛射射中柱等機會，自己亦以個人能力楔贏加比爾後入球追近。入球過程中，辛祖左路引球推進吸引了對方包夾，馬迪因而有更多空間傳中助攻C朗入波。
下半場曼聯一度壓住阿仙奴，早段為阿仙奴入球嘅左閘泰華利斯受壓下出現唔少失誤，包括面對角球傳中手球犯規，令曼聯得到十二碼，不過般奴未能把握。相比之下，狀態更好嘅C朗，今場似乎更適合擔任十二碼劊子手，今次其讓俾般奴主射嘅舉動，恐怕係好心做壞事。不久之後，近期狀態同表現出色嘅夏卡重炮遠射入波，拉開比數之餘亦打沉對方士氣。阿仙奴再次領先兩球之下，阿迪達以賀丁入替沙卡，轉用三中堅陣523保住勝局。
適逢熱刺面對賓福特和波失分，阿仙奴重奪爭四主動權，兩場大戰嘅消耗之後，眾將要咬緊牙關，避免再次「讓四」。曼聯連輸兩場大戰，爭四接近無望，或者球隊係時候開始檢討今季表現，準備下個球季了。