潛力年輕球員 : 夏蘭特丨雖然已成頂級前鋒,但仍然有其潛力


回望2019-20球季季中,夏蘭特初到德甲賽場一鳴驚人,第一場比賽後備上陣,上演帽子戲法;為多蒙特上陣兩場合共57分鐘,就攻入5球。直到而家,夏蘭特喺各項賽事嘅場均入球,都維持喺一球左右,出得嚟就有貨賣,真係唔講得笑。喺加盟蜜蜂兵團嘅兩年過後,夏蘭特搖身一變成為現今球壇嘅頂級前鋒,亦成為曼城同皇家馬德里等歐洲列強爭奪嘅對象。

⚽️身體條件
夏蘭特擁有1米94嘅身高,身體強壯,同時亦擁有飛快嘅速度,實在難得。

⚽️技術出眾
除身體條件優勢以外,夏蘭特技術亦係出眾。當隊友組織攻勢時,夏蘭特往往能掌握迎球嘅時機入楔或以其他方式現位,不論喺陣地戰抑或反擊/快攻嘅情景當中,佢都可以充分運用其身體條件壓贏對方中堅,從而埋門。夏蘭特加速起嚟,有如一頭狂牛,有時真係拉都拉唔跌。

⚽️埋門處理
講到埋門,不得不提夏蘭特嘅射門強而有力,彷如重炮。防守一方若果喺禁區內甚至禁區頂俾到夏蘭特一絲空位,好大機會要付出代價。至於禁區內機會嘅處理,夏蘭特有兩個非常熟練嘅方式,令門將防不勝防,第一係拗腰射遠處網仔,第二就係勁射近柱嘅網頂。

⚽️潛力之處
作為正前鋒,夏蘭特擁有唔錯嘅護球能力,唯傳球方面可以更加優秀。不過,夏蘭特此刻只有21歲,相信大家絕對有機會見到佢傳球能力嘅進化。夏蘭特如果擁有良好嘅傳球能力,加上其本身嘅身體質素,佢有條件開發支點組織串連嘅踢法,令其球路更為廣闊。上述支點能力就係夏蘭特嘅潛力所在,亦係佢同現今嘅最佳9號利雲杜夫斯基差距比較大嘅地方。

🤕傷患問題
除此之外,夏蘭特亦要面臨傷患問題嘅挑戰。夏蘭特加盟多蒙特嘅兩年幾之間,經歷過9次大大少少嘅傷患,主要係肌肉受傷同膝傷,至今已缺席29場比賽,包括今季已缺席17場比賽。不過好彩嘅係,夏蘭特此刻只有21歲,其身體質素嘅發展尚未到達高峰,若果夏蘭特有足夠休息時間俾身體恢復,相信情況會有所改善。

⚽️總結
夏蘭特呢位新星特點鮮明,有頂級嘅條件同能力,足以令佢被視為美斯同C朗「絕代雙驕」嘅接班人之一。與此同時,夏蘭特亦有可以提升嘅地方,令佢未來嘅發揮更上一層樓。小弟在此祝願,夏蘭特能早日解決傷患問題,他日得以走上巔峰,為球迷帶嚟更多精彩嘅時刻。

以下為足本圖文版,歡迎觀看同支持本文合作夥伴 @unitedfans_hk !!
loading

標籤: 夏蘭特  德甲  多蒙特  

留言


請按此登錄後留言。未成為會員? 立即註冊
    快捷鍵:←
    快捷鍵:→