歐聯丨賽後分析 : 曼聯戰術層面略遜一籌 馬體會進攻效率再現 球證表現欠缺說服力 (曼聯 0-1 馬德里體育會 總比數 : 1-2)

第二週歐聯十六強次回合嘅比賽,曼聯於奧脫福球場一球僅負馬體會。今場比賽中,曼聯較為主動,而作客嘅馬體會以防反取態應戰。今仗大部分時間曼聯都要處於主攻陣地戰之中。

士氣反彈🔥】
上一場爭四大戰險勝熱刺,令曼聯上下士氣反彈,今場球隊精神面貌唔錯。球員落力跑動同壓迫,回防亦具有整體性,令球隊得以同馬體會抗衡,上半場甚至取得過優勢。

面對熱刺,C朗經過休息後上陣隨即大發神威,腳踢頭頂連中三元。今仗面對馬體會,經過休息嘅般奴,表現亦有隨體能狀態提升,得以覆蓋唔同位置。C朗同般奴今場勤於走動串連,幫助到球隊嘅組織,如早段嘅快攻之中,兩人喺右路交叉走位配合後傳中,艾蘭加喺小禁區埋門被奧比歷用頭封到,差些打開記錄。下半場早段般奴再為艾蘭加製造機會,可惜僅僅射斜。
不善於陣地戰⚽️】
不過,比賽大部分時間處於主攻陣地戰,曼聯面對馬體會三中堅陣嘅防守,就顯得老鼠拉龜。辛祖同艾蘭加兩翼拉邊創造到空間係好事,但前線球員加上兩閘之間嘅配合未足以滲入對方嘅嚴防重地。辛祖嘗試以其盤扭吸引對方防守包夾後分波,但未成功。曼聯好多時只能以偶有嘅遠射同傳中製造威脅。

半場調整🔀】
曼聯不善於陣地陣中滲入/突破對方防線,令球隊上半場進攻欠缺效率。下半場,球隊比起邊路突破,更多尋找同製造空間傳中,助C朗發揮空中能力,唯傳中質素參差,而收入禁區接應傳中嘅辛祖亦錯失機會。去到下半場中後段,馬體會體力下降,中後場犯規次數增加。曼聯幾次罰球攻勢,擅長傳中嘅泰利斯嘗試斬入禁區,製造到唔少威脅,包括C朗走出空位但僅未能接應嘅一次同華拉尼嘅炮彈式頭槌,都係被表現神勇嘅奧比歷化解。

馬體會進攻效率再現🗡】
馬體會方面,施蒙尼所安排嘅三中堅352陣型防守堅固,後防線身前嘅保護亦係充足。相對地,因馬體會重兵佈防,全軍專注退守,而前線只有菲歷斯同基沙文兩人,所以球隊快攻/反擊次數甚少。

話雖如此,不過曼聯俾到馬體會充分發揮一次半次其快攻/反擊能力,就足以失利。菲歷斯同基沙文嘅反擊串連令球隊得以做出快速嘅配合,加上兩位邊翼衛插上,令曼聯措手不及。馬體會上半場中後段嘅快攻,曾製造菲歴斯嘅入球,可惜越位。另一次快攻,基沙文回後做支點引致麥佳亞上前「標波」而失位,令達洛治要收入中路補位,其後面對左翼衛洛迪嘅插前,達洛治不及回位,讓洛迪頂入唯一入球。馬體會繼首回合嘅對決,再次以成熟嘅配合展現其進攻效率。
球證表現欠缺說服力👨🏼‍⚖️】
今場比賽其中一個焦點,不幸地係關於球證嘅表現。來自斯洛文尼亞嘅球證 Slavko Vincic 今場有幾方面表現不佳,令其執法欠缺說服力。

Vincic今場喺陣地戰之中嘅走位太近,唔止一次喺禁區頂遮住曼聯球員視線,或多或少影響到曼聯球員嘅傳送。

另外,球證團隊今場對於身體接觸尺度不一,對於馬體會嘅犯規動作亦有漏判。20分鐘,文達華喺禁區內從後攔截踢中般奴嘅要害,冇吹,其後馬體會入球過程中路蘭迪撞低費特,入球照計,兩次關鍵嘅犯規之中球證同VAR都冇表示,令人難以接受。

此外,球證於比賽尾段頻繁吹停比賽,影響了比賽運作,Sportbible指出,喺比賽嘅最後30分鐘,比賽時間實際只有11分鐘19秒,對於落後嘅曼聯相當不利。

【總結】
今場蘭歷克連同教練團隊以及球員都相當盡力,但相比馬體會,球隊於體系、用球、防守等戰術層面,的確略遜一籌,加上不幸遇上球證表現差劣,令曼聯出局。

曼聯今季嘅目標只剩爭奪英超前四,但觀乎阿仙奴喺分數、賽程同體能狀態方面都有唔少優勢,睇怕難以達成。今季剩下來嘅日子,喺訓練、戰術、用人等方面,教練團隊或者可以更多為球隊嘅未來打算。

歡迎大家支持本文合作夥伴 @redunited.hk
loading

標籤: 歐聯  曼聯  C朗  般奴  艾蘭加  奧比歷  辛祖  基沙文  洛迪  施蒙尼  

留言


請按此登錄後留言。未成為會員? 立即註冊
    快捷鍵:←
    快捷鍵:→