英超丨賽後文章 : 曼城發揮依舊事半功倍 曼聯上半場透支體力後無以為繼 (曼城 4-1 曼聯) 精選

英超次循環曼市打吡，曼城主場以4-1大炒曼聯。
雙方陣容 :👹C朗缺席
今次打吡其中一個焦點，在於C朗拿度未有出現喺大名單之中。領隊蘭歷克指C朗因傷未能上陣，而C朗家姐曾讚好指出C朗並冇受傷嘅帖文，令事情惹人懷疑。
今場蘭歷克安排球隊大舉壓迫，唔安排現時不善長期奔跑壓迫嘅C朗擔任正選箭頭，係合理嘅決定，相信呢個亦係蘭歷克嘅部署。不過問題在於，C朗真係因傷缺席與否，令其連後備殺手都冇機會做，抑或係因為將帥不和，如《The Athletic》報道嘅説法指C朗因未能出任正選而稱傷離開。

👹大舉壓迫
講返比賽戰況，曼聯於足總杯早已出局，上周中能專注休息調整同備戰。相比周中需要作客應對比賽嘅曼城，曼聯體能狀態相信較好。比賽一開始，曼聯球員便大舉向前壓迫，得到控球權後眾將向前奔跑，牽引對方後防同時提供傳球選擇以維持快速組織。上半場之中，球隊場面上能與曼城抗衡，得以製造機會。費特曾有近門嘅機會，辛祖曾入球追和1-1，但其後錯失再次迫和嘅機會。

👹後防不穩曼聯後防不穩，尤其今仗欠缺華拉尼之下，存在唔少漏洞。比賽早段面對對方左路攻勢，三人看管貝拿度施華之下，竟被其輕鬆擺脫後傳中製造迪布尼打開記錄嘅入球。第二個失球，因雲比沙卡傳球失誤而被打前場反擊，連達路夫頭槌標波頂空氣被科頓挑過，加上麥佳亞其後未能解圍，一連串嘅失誤，輾轉就令球隊再次落後，迪基亞愛莫能助。

⛵️發揮依舊
上半場曼聯可謂用盡體力同曼城抗衡，令雙方大部分時間處於快速嘅對攻之中。曼城踢法同發揮依舊，而迪布尼狀態大勇，引領出唔少機會。球隊控球同組織嘅基礎令球隊即使面對曼聯大舉壓迫，仍能喺上半場有六成控球率，而進攻方面亦比曼聯事半功倍。

👹無法反撲
上半場依靠透支體力嘅曼聯，下半場明顯體能不繼。值得留意嘅係下半場早段，半場休息回氣過後，曼聯已無法同曼城抗衡，除可能因為心態問題外，亦唔排除球隊喺上半場大量消耗體力，令下半場處於體能劣勢，無法反撲。
⛵️絕對優勢
下半場曼城處於絕對優勢，曼聯難以從後場將皮球運輸上前，令連換兩位進攻球員嘅效用有限。曼城下半場擁有近八成控球率，久攻之下，馬列斯喺下半場梅開二度，助球隊最終大勝4-1。

⛵️衞冕之路
曼城打贏今場大戰之後，再次拉開榜優首優勢，踢多一場之下領先利物浦6分。對比尚有四場大戰未踢嘅利記，曼城接下來嘅英超賽程相對輕鬆，除歐聯淘汰賽所帶來嘅體能負擔之外，喺英超衞冕之路，只剩下於主場迎戰利記嘅重大考驗。

👹兇多吉少
而曼聯方面，球隊爭四前景並唔樂觀，踢少三場嘅阿仙奴已經超越曼聯，升上第四位。今場體能透支過後，曼聯接下來兩場分別要面對熱刺、馬體會，睇怕都係兇多吉少。