英超丨賽後文章 : 熱刺攻得鋭守得穩 曼城大軍壓境不敵反擊 (曼城 2-3 熱刺) 精選

周末嘅英超大戰，曼城主場以 2-3 不敵熱刺。
雙方陣容:🐔體能優勢
比賽之前，相信唔少球迷會認為曼城面對近況不佳嘅熱刺能輕鬆取勝。不過，事實並非如此，熱刺沒有周中歐洲賽壓力之下，有六日休息調整同備戰嘅時間。曼城上一場於周中面對士砵亭時，雖然未有遇到太大考驗，但仍有一定體能消耗。今場曼城雖有主場優勢，但休息調整時間比熱刺少三日，熱刺係體能較充足嘅一方。
🐔早早領先
第4分鐘，面對曼城向前壓迫，熱刺以更快嘅運轉速度，越過對方前線同中線，俾到哈利簡尼同孫興慜施展一前一後嘅配合。哈利簡尼回後接應傳送做支點，其扭腰一腳傳向前嘅漂亮駁腳，快過對方中堅迪亞斯製造越位陷阱嘅步伐，俾到孫興慜向前衝過對方防線，接應皮球再助攻古路斯夫斯基入球打開記錄。熱刺早早領先。

⛵️大軍壓境
曼城落後之下，隨即大軍壓境，而領先嘅熱刺則全軍退守，並尋找反擊機會。干地安排熱刺 541 企位嘅防守陣型相當緊密，曼城要滲入對方禁區，絕不容易。早段嘅曼城由科頓擔任左翼，進攻效果一般。到上半場中段開始，主帥哥迪奧拿安排兩翼調位，史逹寧轉打左翼，科頓擔任右翼。史逹寧拉左邊，連同狀態大勇嘅簡些路，得以製造機會，包括簡些路同史達寧「撞牆」配合後從左邊滲入禁區射門，以及根度簡射中柱嘅機會。到33分鐘，史達寧左路傳中，出迎嘅門將羅利斯受迪布尼干擾下未有接住皮球，根度簡後上補中助曼城迫和1-1。其後經過一番拉鋸，兩隊半場打成平手。
⛵️🐔連續反擊
半場休息過後，曼城繼續強攻，而熱刺繼續防反取態。曼城大軍壓上，中場根度簡同迪布尼集中進攻，球隊防守人手較少，單一防中洛迪難以時時看管對方重心哈利簡尼。面對今場體能較充足嘅熱刺，當曼城前場壓迫嘅成功率隨體能下降，就容易俾到機會熱刺反撃。59分鐘，哈利老孫組合再次製造反撃，孫興慜助攻哈利簡尼後上射入，熱刺再次領先。其後簡尼再入一球，可惜助攻嘅古路斯夫斯基越位在先。

⛵️右路傳中
下半場中段，哥迪奧拿決定以馬列斯入替史達寧，馬列斯入替後擔任熟悉嘅右翼位置，而另外兩位進攻球員貝拿度施華同科頓都集中於中路活動。曼城調整了踢法，主要以迪布尼、馬列斯同獲加於右路傳中為主，但面對熱刺嘅三中堅防線，自身又欠缺擅頂之人下，進攻效果一般。直至補時階段，一次右路傳中輾轉製造羅美路禁區內手球犯規，馬列斯操刀十二碼扳平。
🐔絕殺
眼見雙方將要握手言和之濟，熱刺一個快攻，古路斯夫斯基擺脫體能下降嘅簡些路，再左路傳中，哈利簡尼壓過獲加頂頭槌入球絕殺。最終熱刺作客以2-3勝出。

⛵️🐔總結
今場熱刺展現了體能優勢，進攻相當運作快而鋭利，而防守隊形亦能長時間保持緊密。哈利簡尼今場表現尤其出色，其支點傳送嘅時機同位置，往往都恰到好處，而插入禁區埋門更係防不勝防。今場勝利，足以一洗近期連敗嘅頹氣。

而曼城方面，今場球隊落敗過後，多踢一場之下，喺聯賽榜有6分優勢，教練團隊需要適時調整，以同身後嘅利物浦保持距離。