曼聯絕殺韋斯咸丨比起戰術，心態同勇氣更值得欣賞 精選

英超爭四之戰，曼聯最後一擊絕殺韋斯咸。

今場兩隊同樣以4231陣型應戰，對攻時勢均力敵，中場搶奪非常激烈。到上半場中段，曼聯壓迫有效令韋斯咸難以組織上前，曼聯有較多主攻陣地戰嘅時間。
🔴⚒️老鼠拉龜
不過，韋斯咸收縮時，曼聯大部份時間只有左翼艾寧加拉邊，而右翼格連活主要於中路活動。曼聯未能拉開對方變形成442陣嘅防線，多次嘗試於中路快速配合未能成功，只能靠高波以及對方失誤製造機會。

或許因為上半場嘅戰況，韋斯咸領隊莫耶斯喺下半場直接安排球隊以防反踢法為主，亦成功限制曼聯嘅攻勢。
🔴賭博
由於久攻不下，蘭歷克於82分鐘換出防中費特，轉陣成424，中場為般奴同麥湯文尼，前線由馬斯亞、卡雲尼、C朗同拉舒福特攻堅。蘭歷克此舉可謂「賭博」，幾乎放棄中場防守之下，被韋斯咸兩次反擊侵襲，一次製造了角球攻勢，蘇捷頭鎚僅僅斜出，另一次迪勤懷斯左路推進傳中省中防守球員改變方向，需要迪基亞快速反應嘅撲救，力保不失。

風聲鶴唳之後，曼聯最後一擊嘅左路長傳，韋斯咸後備出場嘅右閘費特歷斯頭槌失誤未能解圍，四個前鋒製造絕殺，C朗同馬斯亞先後推進，馬斯亞分俾卡雲尼左路助攻拉舒福特門前絕殺，蘭歷克最終「賭」贏了，曼聯獲得寶貴嘅三分。
🔴勇氣
比起戰術層面，蘭歷克 (連同教練團隊) 今場更值得被欣賞嘅地方，係積極求變嘅心態同放手一搏嘅勇氣。曼聯今場大部分時間顯得老鼠拉龜，進攻乏力已成事實，而前段提到嘅防守風險，相信蘭帥亦有預料。蘭帥賭博般嘅調動，充分反映其爭勝嘅決心，加上眾將堅持向前壓迫同衝擊，加上少許運氣，最終球隊收成正果。
今場勝利，相信能提升曼聯上下嘅士氣。不過喺未來值得留意嘅，依然係面對密集嘅方法，始終球隊唔可能長期靠「賭博」取勝。

⚒️繼續努力
最後，小弟亦要俾掌聲長時間堅守嘅韋斯咸。球隊守到最後先失波，而聯賽榜第四嘅位置亦被曼聯爬過，相當可惜。不過聯賽長跑尚有唔少賽程，相信韋斯咸仍有力爭奪前四，希望莫耶斯連同眾將繼續努力。