李斯特城作客曼城「錯」完「改正」 返到主場贏重要勝仗 精選 推薦

聖誕快車賽期，李斯特城連續面對曼城同利物浦兩隊爭標份子。李城首先作客以6-3被曼城擊敗，然後返到主場隨即發威，以一球小勝利物浦。
⛵🆚🦊曼城進攻完整
曼城今場進攻非常完整，史達寧同馬列斯兩翼拉邊，與各自身後嘅左右中場根度簡同迪布尼、左右閘施真高同簡些路，加上游走中前場嘅貝拿度施華，交錯穿插配合，早段曼城多次撕破李城防線。

⛵🆚🦊李城防守力未足以抵擋曼城
李城上半場以 4231/4411 陣型應戰，兩翼佩雷斯同陸文雖有回防，但防守力未足以抵擋曼城嘅邊路攻勢，加上沒有正式防守中場「逗住」，李城防線欠缺足夠保護，而李城防線亦唔係一貫嘅正選，加上周中比對手踢多一場嘅體能劣勢，李城就算收縮防守，亦被曼城多次打穿，第一個失球係中路，第三個係左邊(對方右路)，加上兩個十二碼，球隊上半場中段落後四球。
⛵🆚🦊反擊需時
進攻方面，上半場李城嘅進攻主要由邊路推進嘅反擊，但收縮防守後，兩翼陸文要從後場向前跑，起點離對方防線尚有一段距離，球隊反擊需時，讓曼城球員得以回防。

⛵🆚🦊轉陣
下半場，羅渣士以卡斯坦尼入替佩雷斯，轉陣成三中堅陣541，球隊由防守到反擊，效果截然不同。球隊防守明顯更加緊密。

進攻方面，李城下半場嘅反擊主要集中中路，而三位衝擊防線嘅球員馬迪臣、伊恩拿祖同陸文，向前衝嘅起點推前至中線附近，亦係對方防線附近，令反擊效果比上半場好。55分鐘，卡斯坦尼後場長傳至中線後嘅馬迪臣挑過冼腳嘅拿樸迪，製造3打1嘅攻勢入破蛋一球。59分鐘，馬迪臣從中後場引領反擊，伊恩拿祖同陸文由中線後起跑，馬迪臣擺脫兩人，分波俾伊恩拿祖助攻陸文追近成 4-2。其後馬迪臣遠射被艾達臣撲出，伊恩拿祖補中令球隊一度追近至4-3，可惜其後一再於死球失波，最終以6-3落敗。
⛵🆚🦊成功「改正」
面對曼城，羅渣士收起了華迪同尼迪迪，或者係顯示著球隊更重視三日後主場迎戰利物浦嘅比賽。而面對爭冠份子曼城，上半場「錯」完，下半場成功「改正」，對下一場面對利記嘅比賽相當有益。

🦊🆚🔴力保不失
返到主場，李城排陣相對地稍為進取，沒有以三中堅陣應戰，而係用 4312陣型。李城今場依然主打防反踢法，面對爭冠份子利物浦，防守算係穩陣，對方有沙拿長時間拉邊之下，球隊難免仍會俾到機會對方，幸好舒米高狀態大勇，多番作出撲救 (包括沙拿嘅十二碼) ，加上文尼未能把握半單刀機會，李城最終力保不失。

🦊🆚🔴進攻雖少但效果良好
李城今場進攻次數少，只有6次射門，但勝在進攻效果良好。上半場中後段，利記體能下降時李城兩次打入對方心臟地帶，一次僅被馬迪普封到，一次馬迪臣射門僅僅斜出。下半場嘅第56分鐘，羅渣士以陸克文入替伊恩拿祖。陸文有體能優勢下，隨即展現強大嘅爆發力，加上中場中賀爾拉左邊幫手串連有引開馬迪普嘅效果，陸文從中線殺入禁區射入，一箭定江山。🦊🆚🔴重要嘅勝仗
從李斯特城兩場比賽中可見球隊不斷調整。歐霸盃同聯賽盃出局之下，擊敗利物浦嘅勝仗尤其重要，相信令球隊士氣提升，有助應對接下來嘅難關。