感謝阿古路 丨臨別縱有遺憾 但不乏美好回憶

阿古路，一位盤扭、頭錘、射術、走位、速度.... 樣樣皆精嘅頂級前鋒，今日正式宣佈退役。
十幾年前，阿古路喺馬體會漸露鋒芒。2011/12, 轉投曼城嘅第一季，就創造歷史。當季英超煞科戰，補時93:20, Agrueoooooooooo!!!! 阿古路入球，曼城反勝QPR，聯賽榜反壓曼聯。相隔四十四年，曼城再奪頂級聯賽冠軍。阿古路除衫慶祝，伊蒂哈德球場眾人狂歡嘅畫面，相信係佢足球生涯中，最美好嘅回憶。

其後哥迪奧拿來到英超，帶領曼城開創盛世，而阿古路成為了球隊歷史神射手，助球隊四年內三奪英超，可惜曼城離歐聯冠軍嘅目標，只差一步。

阿古路球員生涯嘅尾段或者充滿了遺憾。2020年開始長期受傷患困擾，上季錯失了歐聯冠軍，今季轉投巴塞尋找美斯，美斯卻被迫離隊，最後自己因心臟問題被迫退役，實在令人惋惜。
不過，阿古路球員生涯嘅最後時光，其實亦不乏美好嘅回憶。20/21球季英超煞科戰之中，Agrueoooooooooo!!!!，阿古路梅開二度，評述員馬田泰萊以球場嘅廣播，重現了當年嘅經典時刻，造就阿古路完美告別英超賽場。而國家隊方面，阿古路同好兄弟美斯一齊為阿根庭打拼十幾年，連年同房進睡，今年美洲盃終於一同圓夢了。

阿古路球員生涯最後嘅入球，來自西班牙嘅國家打吡。喺一場極具份量嘅比賽中，面對皇馬密集防守，阿古路窩利射入，可見佢嘅級數依舊咁高。

點樣都好，健康比足球重要得多，阿古路喺醫生建議下，最終決定退役。感謝阿古路多年來嘅付出，為球迷帶來無數次精彩嘅表現同好多美好嘅回憶。同時祝阿古路身體健康，喺另一個位置，發展順利。