回歸晏菲路丨謝拉特部署同調動都有紋有路 精選

今周嘅英超比賽，謝拉特以阿士東維拉領隊身份回歸晏菲路球場，獲全場掌聲迎接。
今場謝拉特嘅部署同調動都有紋有路。謝帥上半場先安排維拉以防反取態應戰，防守整體性強，相當緊密。利記兩翼沙拿文尼較少拉邊下，難以製造太多機會。進攻方面，屈堅斯、積及藍斯同楊格偶爾嘅衝擊亦有效果，現場落大雨之下，利記後防受壓時偶有失誤。

下半場，高普安排沙拿同文尼兩翼增加拉邊，提升了邊路衝擊同短傳滲入嘅效果。維拉守到 67分鐘，明斯遭沙拿突破而犯規輸十二碼，球隊先至落後。

落後之下，謝拉特反應迅速，先後於69同 74分鐘，分別以布安迪亞入替老將楊格，以英斯入替藍斯，補充了前線嘅體能以向前衝擊搶攻。下半場中後段開始，維拉漸漸反壓體力下降嘅利記。球隊進攻配合相當流暢，亦有衝擊halfspace 嘅組織滲入禁區底線，製造唔少威脅，差少少就可以扳平比數。
雖然今場阿士東維拉最終不敵利物浦，但謝拉特及其團隊，表現良好，利用了維拉球員賽程壓力較利記球員少嘅體能優勢，安排球隊留前鬥後，而細節上嘅安排亦係足夠，可見謝拉特及其團隊嘅能力。5戰3勝，僅負曼城同利記，絕對唔失禮，大家可以期待謝拉特團隊之後嘅發揮。