〔英超: 利物浦 4-0 阿仙奴 賽後文章〕利物浦表現強勢而穩定 阿仙奴處境困難 精選

周未嘅英超大戰，利物浦主場出擊以4-0大勝阿仙奴，賽後於聯賽榜爬過同日輸波嘅韋斯咸，而阿仙奴只能留喺第五位。
雙方陣容:

🔴減低風險
早段兩隊互相拉鋸，其中利記早段嘗試以高波長傳，越過對方壓迫，攻擊對方防線身後。雖然利記用長傳嘅攻擊效果一般，但減低了喺中後場被對方搶到皮球嘅風險。
🔫漸漸受壓
今場阿仙奴以4231應戰，防守時兩翼沙卡同史密夫路維回防足夠，球隊防守未有因人數不足而暴露大片空間。不過，面對利記嘅壓力，兩人難以向前突破以牽制對方，而頂喺前面嘅奧巴美楊同拿卡錫迪，面對雲迪克同馬迪普，難有優勢。阿仙奴因而漸漸受壓，增加了收縮防守嘅時間。

🔴進攻變化多
利物浦面對阿仙奴密集防守時，沙拿文尼兩翼拉邊，左右攻勢做到唔同嘅變化，進攻路線足夠多，如左閘森美卡斯插入左路禁區底線傳中製造沙拿嘅機會，右閘阿諾除右路前插外亦曾殺入中路射門，而中場三人堤亞高、張伯倫同卡賓奴輪番後上插入禁區，亦製造唔少威脅。利記球員嘅能力，加上種種嘅進攻變化，令球隊能滲入對方危險地帶，阿仙奴只能靠門將藍斯度暫保不失。直到39分鐘，利記右路罰球攻勢，文尼頭鎚頂入領先。

🔴適時收縮
今季可見高普及其團隊安排球隊上半場中段開始，增加了偶爾嘅收縮防守。大大減少對方打快攻/反擊嘅空間。當球隊體力下降，未能以壓迫搶到控球權時，收縮防守以減少全隊前後嘅上落泛園，相對繼續壓迫較能減慢體能流失。利記今場面對沒有歐聯賽壓力而體能較好嘅阿仙奴，能做到適時收縮，係力保不失嘅關鍵。
🔫難以控球，風聲鶴唳
阿仙奴落後一球之下，想必阿迪達指示了球隊把握控球權爭取製造機會。不過，利記體能足夠時壓迫力強大，要保持控球再組織機會，實在困難。

15分鐘半場休息過後，利記下半場早段展開猛攻，阿仙奴中後場面對利記嘅壓迫，失誤瀕瀕，後防風聲鶴唳。52分鐘，左閘泰華利斯後場失誤送禮，「助攻」祖達冷靜推過藍斯度射入，拉開記錄至 2-0。
或許，阿仙奴用利記早段嘅做法，會比較好。用簡單嘅長傳進攻，有助減低喺中後場被對方搶到皮球嘅風險，因此第二個失球或者可以避免。到下半場中段，利記壓迫力下降之時，再以地面組織上前，比賽或有轉機。

🔴把握空間擴大比數
阿仙奴落後兩球下，只能向前搶攻，盡力一搏。但到了下半場中段，球隊縱有體能優勢，但壓迫力隨體能下降時，未能破壞利記嘅控球組織。阿仙奴向前壓迫，中後場難免暴露了更多空間。利記把握了其空間，以流暢嘅組織，擴大比數。73分鐘，艾利臣傳高波至左路，森美卡斯同祖達各頂一下頭鎚將皮球運上前場兼打穿對方防線，助前面「雙鬼拍門」，文尼助攻沙拿門前射入。77分鐘，文尼到禁區頂分波俾偏右嘅沙拿，沙拿送直線，幫助阿諾助攻南野拓實，喺門前射入埋齋嘅一球。
🔴🔫總結
利記最終以4-0大勝阿仙奴。利記今場展現了進攻變化同級數，表現強勢，而適時收縮令球隊表現穩定。阿仙奴今場面對利記，處境困難，可見實力上同對方有一定差距，只能寄望球隊繼續進步。