一代傳奇慘變「叛徒」丨 要噓的噓了 要罵的罵了

周三晚上嘅歐聯分組賽,蘇亞雷斯代表馬體會作客大戰利物浦,倒戈回歸晏菲路球場嘅佢,被唔少利迷以噓聲喝倒彩。

睇嚟利迷們對於蘇亞雷斯兩年前代表巴塞倒戈面對利記時,入球後鏟草慶祝,以及同利記主力羅拔臣惡言相向,仍耿耿於懷。兩年後嘅今日,利迷同蘇亞雷斯重遇,仍會以噓聲「招呼」呢位球隊嘅舊將。

想當年,利物浦人腳班底嘅實力同依家有一定距離。蘇亞雷斯所作出嘅貢獻非常關鍵,如2013-14球季於英超為利記上陣33場,攻入31球並交出17個助攻。當時嘅蘇亞雷斯能時常以頂級嘅個人能力過關斬將,形成極強嘅牽制力,足以牽引對手為隊友製造空間,創造機會,幾乎係一已之力將利記帶上爭冠行列。雖然最後球隊都係屈居英超亞軍,但蘇亞雷斯每場賣力地踢,哪怕隻腳腫到豬蹄咁仍堅持帶傷上陣,真係無得彈。就算蘇亞雷斯喺利記嘅生涯只有一個聯賽盃冠軍,其表現亦足以令佢成為利記一代傳奇。蘇亞雷斯接過利物浦「國王」杜格利殊嘅7號球衣,三個半球季之中所表現嘅水準同鬥志毫不失禮。
蘇亞雷斯効力利記時,相信為利迷們帶來了唔少歡樂。不過,離開利記後,區區一次倒戈入球後唔算過份嘅慶祝 (於魯營球場面對巴塞球迷,而且未算瘋狂慶祝),以及於比賽中常見嘅球員爭拗,就令呢位名將重回舊地時嘅待遇降格成如奧雲(曾效力利記但轉投宿敵曼聯)般嘅叛徒,似乎殘酷了一點。

從離隊至今,蘇亞雷斯唔止一次表達對利物浦嘅感情,而今場比賽後佢被影到手持利物浦新球季嘅童裝球衣,相信係俾佢兒女著嘅,證明佢同舊東家仍有一定感情嘅連結。
利迷對於蘇亞雷斯之前嘅行為,相信要噓嘅噓咗,要鬧嘅鬧咗。小弟作為其中一位利迷,個人好希望見到利迷有朝一日放下蘇亞雷斯倒戈時嘅往事,再次重聚之時對待呢位傳奇嘅方式,會好似喺上周對待同樣係球隊傳奇嘅拉蘭拿一樣,全場拍掌,大家可以好好咁重聚。
標籤: 利物浦  蘇亞雷斯  拉蘭拿  

留言


請按此登錄後留言。未成為會員? 立即註冊
    快捷鍵:←
    快捷鍵:→