領隊分析丨邊位領隊能帶曼聯走向光明 ?

文: 時代的波經 Lee Keith
圖: RedUnitedHK
曼聯面對利物浦大敗之後，曼迷要求領隊蘇斯克查下台嘅聲音連綿不絕。然而，球隊管理層以及費格遜仍願意給予蘇帥最後機會。話雖如此，但若果曼聯成績唔見起色，換帥或許只係時間問題，球迷們仍然可以期待新帥上任。

有幾位教練皆有傳會接掌曼聯帥位，其令人期待，亦最有可能嘅人選，分別係干地同施丹。兩位待業嘅名帥之中，邊個教曼聯好？

陣型/戰術
干地以三中堅速度型戰術聞名，於絕大部份比賽沿用三中堅陣，上季佢就成功帶領國際米蘭重奪失落了十一年嘅意甲冠軍，令人期待佢可以同樣為曼聯重奪冠軍。然而，英超嘅風格有別於意甲，英超中下游球隊傾向收縮防守，干地嘅三中堅速度型戰術或會受到限制。
相比之下，施丹所展現嘅戰術變化較多，唔同嘅陣型同取態都會使用，或能更好地運用曼聯豐厚嘅班底，善用唔同嘅球員，呢個正正係蘇斯克查最缺乏嘅。

合作方面
干地軍紀嚴明，作風比較強硬，或許較難同C朗、般奴、普巴等骨幹球員愉快合作，甚至有可能步摩連奴時期將帥不和嘅後塵。

而施丹執教皇馬時，經已同C朗、賓斯馬、拉莫斯等効力球隊多年嘅骨幹共事。而如果施丹執教曼聯，會有曾經合作過嘅C朗同華拉尼，擔當將帥之間嘅橋樑，有望合作愉快。

權力
干地開出了一些執教嘅條件，如轉會操作權等，若最終由干地接掌帥印，就表示曼聯高層願意放出權力。
施丹執教皇馬成績卓越，但年資同經驗不及教過祖雲達斯、意大利國家隊、車路士、國際米蘭嘅干地。施丹於球員時代已成為皇馬輝煌歷史上嘅重要一員，接掌皇馬帥印時已有較大嘅話語權。不過，若果去到曼聯，施丹沒有了名宿嘅光環，其執教工作將有更大挑戰。

歡迎大家支持本文合作夥伴 @redunited.hk