〔歐聯短評 : 馬德里體育會 2-3 利物浦〕利物浦「虎頭蛇身」馬體會以悅目組織扭轉形勢 十二碼爭議之中 球證未必係「大細超」 精選

歐聯分組賽第三輪大戰，馬德里體育會主場迎戰利物浦。馬體會下半場大部份時間踢少一人之下，最終利記贏2-3。
早段連轟兩球
比賽早段，利記大舉壓前，壓制三中堅嘅馬體會。第8分鐘，狀態大勇嘅沙拿從右路帶球內切，連續避開兩人後射門，皮球省中米拿入網，0-1。5分鐘後，未站穩陣腳嘅馬體會再失一球，菲利比面對阿諾傳中解圍不遠，基達於禁區頂「窩利」抽射，球速之快加上帶有孤度令奧比歷鞭長莫及。

開始放緩
利記領先兩球之下，更多控球在腳，放慢節奏，有助保留體力。與此同時，利記壓迫力亦有下降，可能同本身體能狀態有關，畢竟今場嘅正選陣容，除門將外同上場對屈福特一樣。今場高普其實可以作出輪換，俾法賓奴同張伯倫正選上陣，而將兩人放落後備嘅決定，可能係因為高普希望兩人有更多休息，以備周末嘅作客曼聯嘅「雙紅會」。
用球方式扭轉形勢
利記以控球在腳為主，見到機會時會大腳長傳打對方防線身後，但馬體會防線深度足夠，利記長傳效果一般。而馬體會用球頗有效率，施蒙尼安排嘅三中堅陣，令球隊中後場足夠緊密，能快速將波運上前場，透過基沙文、菲力斯、卡拉斯高、林馬等人嘅配合，打出悅目嘅組織，幾次製造了具威脅嘅反擊/快攻機會，若非艾利臣表現出色，利記或會落後。

用球方式嘅分別，加上利記壓迫力下降，馬體會取回形勢，憑角球攻勢同一次非常順暢嘅組織，基沙文梅開二度，追平比數。

紅牌成為轉折點
今場比賽嘅轉折點，相信係52分鐘，基沙文舉腳踢中費明奴頭部，被判危險動作而被罰紅牌出場。馬體會踢少一人之下，無辦法同利記抗衡，利記可以保持控球，尋找機會入球取勝。
十二碼爭議
馬體會捱到77分鐘，靴莫素禁區內推跌祖達被判十二碼，沙拿射入至勝一球。幾分鐘後，剛被推跌嘅祖達，禁區內推跌占美尼美斯，球證查看過VAR片段後，最終沒有判罰十二碼。

球證未必係「大細超」
唔少意見認為同樣係從後推跌，馬體會應同樣地獲得十二碼。值得留意嘅係，靴莫素犯規過程中手同身體都係向祖達背部擴張，使其跌倒。至於祖達嘅疑似犯規動作，祖達「推」嘅時候手部未有向身前嘅占美利斯擴張，而係向內收。比起靴莫素輸十二碼嘅動作，祖達動作嘅接觸面同所施加嘅力量明顯較小，相信上述原因令球證未有俾馬體會十二碼。

總結
利物浦今場可謂「虎頭蛇身」，到下半場大部份時間踢多一人，可以全取三分之餘亦節省體能，相當幸運。而馬體會今場展現唔少悅目嘅組織，上半場連入兩球迫和，令比賽變得精彩。可惜基沙文一次唔小心嘅犯規，被罰紅牌令球隊處於劣勢，最終僅僅落敗。