正在「奴」化 ? 利物浦與雲加後期阿仙奴 兩大相似之處 精選

上篇文章講到利物浦轉會操作取態保守，於對手們積極補強下，不進則退，球隊今個球季嘅路途將更加艱難。
球隊嘅情況，相信利記管理層FSG亦都明白。不過，似乎管理層現時嘅目標並非志在同列強競爭，而係只想保住歐聯席位，獲得穩定收入。利記由一隊冠軍球隊，變成爭四球隊，情況令小弟(筆者)諗起雲加後期嘅阿仙奴。

將現時嘅利記同當時正在墮落嘅阿仙奴比較，可能言之尚早，不過今日嘅利記已經有兩個元素同當時阿仙奴相似。

1. 成也節儉 敗也節儉
回望阿仙奴於英超不敗奪冠球季後嘅九個球季，並沒花費超過2000萬歐元嘅收購，球隊於05年贏得足總盃冠軍後，便進入九年無冠嘅時期了。
利記用錢一向為節儉，從賀芬咸簽入費明奴，從修咸頓簽入文尼，加上從羅馬買入沙拿，收購三叉戟嘅洗費為 1.242億歐元，不及一個麥巴比嘅身價。而近年轉會費較高嘅兩個收購，雲迪克同艾利臣，花費係來自賣出古天奴所得嘅資金，屬量入為出，實際上未有太大投入。

當年利記以精打細算嘅轉會方針，組成歐聯同英超冠軍嘅陣容，絕對值得驕傲。不過，若管理層滿足於贏得歐聯同英超冠軍，減少資金投入，維持安穩賺錢嘅取態，球隊可能會走向阿仙奴嘅無冠軌跡。

2. 招攬人才嘅人才離隊
阿仙奴不敗奪冠，有賴當年嘅副主席David Dein 組建了實力極強嘅陣容。隨David Dein離隊，阿仙奴後代嘅主力不及當年冠軍隊嘅骨幹，球隊漸漸退步成長年嘅爭四球隊。
今日嘅利記亦面對同樣問題，利記能引入「埃及文明」、雲迪克、艾利臣、法賓奴、韋拿杜姆、羅拔臣等球隊骨幹，組成歐聯同英超冠軍陣容，體育總監Michael Edwards功不可沒。

不過，近期唔少報道包括《Liverpool Echo》亦有指出 Michael Edwards 預計將於今季後離開球隊。未來幾年，球隊主力需要逐漸接班，管理層投資保守，加上缺少 Edwards 嘅眼光之下，恐怕球隊難以順利組成下一個「黃金一代」，可能會走向當年阿仙奴退步嘅軌跡。

此刻將現時嘅利記預測成當年嘅阿仙奴比較，確實言之尚早。利物浦主力此刻尚未完全走過高峰，擅於培育球員嘅高普尚未完約，希望球隊管理層更加積極 (尤其唔可能如車路士般一擲千金，迅速將爭四班底組建成歐聯冠軍陣容)，盡早開始逐漸為球隊注入年輕力量，短期可分擔主力嘅上陣時間，同時有助長期而言嘅接班工作。