〔英超短評 : 阿仙奴 0-2 車路士〕阿仙奴難有優勢 泰亞尼同施美度同病相憐 杜曹戰術安排完善 造就佳話 精選

英超第二輪大戰，阿仙奴主場以0-2不敵車路士。

🔴阿仙奴進取難有優勢阿仙奴今場以 4231陣型迎戰，取態進取，開賽早段搶攻之下，製造了少許機會。不過，阿仙奴始終未能佔明顯優勢，排三中堅陣嘅車仔，有足夠緊密度讓球隊從後組織運送上前，阿仙奴前場壓迫難以破壞或搶奪車仔控球以製造機會。

🔴後防人手不足
阿仙奴進取嘅踢法中，兩翼沙卡以及比比防守泛圍偏前，主要防守工作為前場壓迫，成為前線屏障。到上半場中段，阿仙奴減少壓迫，阿迪達並未安排兩翼回防幫助兩閘，而陣營中只有兩位防中，未能覆蓋邊路，令左閘泰亞尼需兼固中路，繼而幾次被後上嘅占士突破右路，造成兩次失球。

🔴泰亞尼同施美度同病相憐阿仙奴情況令人想起歐國盃中嘅葡萄牙，面對德國時右路防守因上述同樣問題，被對方高辛斯突破左路，當時嘅施美度，同今場嘅泰亞尼，係當中嘅受害者。不過，第二球失球中，曼治身前仍有馬里，泰亞尼如更早回到左路看管占士，或者能避免失波。

🦁杜曹戰術安排完善
杜曹今場戰術安排完善，安排右翼衛占士於陣地戰當中，上到右翼位置，增加前場組織同攻擊人手，而偏右中堅艾斯派古達移至右閘位 (上圖可見艾斯派古達覆蓋了右閘位置)，逗住占士，以及幫助中後場嘅運送，車仔陣型變成4231，攻擊火力更強。
🦁杜曹讓盧卡古充分發揮，造就佳話
另一點值得一提嘅係，杜曹善用了盧卡古嘅身體質素，讓其充分發揮支點能力，成功製造打開記錄嘅入球。杜曹嘅安排加上盧卡古本身實力，造就其回歸車仔第一場即刻建功嘅佳話。

🔴只能力拼搶攻
下半場，落後兩球嘅阿仙奴只能力拼搶攻，奈何人腳實力確實與車路士有著差距，難以獲得優勢，爭取入球，最後比數維持於0-2完場。

🔴阿迪達又再固執?
唔少人認為，阿迪達思想固執，盲目追求進攻型嘅風格，係阿仙奴成績不佳嘅原因。至於今場而言，若阿仙奴保守應戰，使用同樣嘅三中堅陣，亦未必能抵擋車路士攻勢。車路士面對密集組織力不錯，加上擁有身形龐大能且壓倒兩位中堅嘅盧卡古於最前方，就算阿仙奴保守應戰，相信仍難以力保不失。阿迪達今場選擇進攻取態，盡量牽制車仔同製造機會，其實有其道理，未必係固執所導致。