相愛但緣份已到盡頭 美斯離開巴塞 有如童話幻滅丨兩大奸角之中 一個財大氣粗 一個根本不必要 精選

巴塞隆拿因財困同西甲薪酬限制，巴塞無法同美斯簽新合約，球會主席拿樸迪於記者會表明，球王以自由身轉會，而美斯亦於記者會淚別魯營球場。
還記得上個夏天，美斯曾經要求離開巴塞，頂唔順球會前主席巴杜姆又好，權力鬥爭又好，美斯都選擇留效巴塞，係愛，亦係責任(當時尚有一年合約)。不過，正所謂相愛很難，有時候，當緣份去到盡頭，亦不得不分道揚鑣。

巴杜姆財大氣粗，埋下伏線
若果巴塞同美斯，係童話故事嘅主角，今次就有兩個「奸角」令美斯離隊了。首先係巴塞前主席巴杜姆，任內財大氣粗，高價簽入丹比利、基沙文、古天奴等球員，加上給予多名球員高昂嘅薪酬，當中包括少有上陣嘅烏迪迪同比真歷，令球會有大量支出，埋下財困同未能乎合薪酬限制嘅伏線。

另一個「奸角」，就係西甲賽會。賽會先設立財務平衡規定，跟據球會財政狀況限制薪金支出。近年負債嘅巴塞，未能達到財務平衡規定嘅要求，就算美斯願意減薪一半，巴塞亦無法再次簽入美斯。此時，西甲計劃將未來四十年嘅一成股份賣到CVC投資基金，再將兩億七千萬資金以貸款方式分予巴塞，令球隊能跟美斯簽約。

巴塞係被迫一方
新規定令巴塞只有兩個選擇，一係犧牲未來四十年嘅財政利益同自主權，一係放棄同球王美斯簽約。由於計劃不利於球隊長遠利益，巴塞不願接受CVC基金嘅貸款，球隊最終未能與美斯簽約。
攬炒
西甲賽會一連串手段，對自身利益亦有損害。美斯可謂西甲多年來嘅招牌，當球王不再征戰西甲，其聯賽嘅吸引力將進一步下滑，難於歐洲頂級聯賽之間嘅競爭中取得優勢，賽會嘅手段可謂攬炒。

有必要嗎？
西甲賽會嘅新規定，係美斯離開巴塞嘅主因。有指西甲賽會希望透過上述手段，透過參與球隊財政，成為「債主」，將不參與歐超聯列入貸款條件之一。哪怕損害自身利益，都要將其賽事斬草除根。但實際上有必要嗎？

歐超聯於上季宣佈推出時，歐洲各隊名宿、球員以至球迷皆強烈反對，各隊球迷甚至到球場外示威，尤其英超Big6球隊。其後部分球隊管理層亦已就歐超聯事件道歉並退出主辦歐超聯賽事，就算重啟歐超聯計劃，又會有多少歐洲列強球隊願意參與賽事？當歐洲列強不願「重蹈覆轍」跳蹧至歐超聯，其號召力、收入等效果將同原本各主辦球隊嘅期望有一定落差。歐超聯原本就難以實行，難以威脅西甲聯賽嘅地位。
適得其反
從今次美斯離開巴塞，可見西甲賽會注重權威，亦憂慮歐超聯死灰復燃。上段主要分析原本歐超聯死灰復燃嘅可能性，但美斯離隊，轟動球壇，亦傷害了非常多球迷嘅感情，事情或會帶來變數。西甲賽會作為擁有權力嘅一方，亦係事情嘅始作俑者，若非其一連串手段，美斯唔需要離開巴塞。西甲賽會希望防止歐超聯嘅舉辦，但經過美斯被迫轉會後，上述手段可能反而會成為各球隊自立門戶，成立歐超聯嘅推動力。

總括而言，巴塞前主席巴杜姆財大氣粗，埋下無法與美斯簽新約嘅伏線。而手持權力嘅西甲賽會手段非常進取，不惜攬炒以迫使巴塞受其控制，手段除可見賽會憂慮歐超聯外，亦係注重權威嘅表現。歐超聯復辦機會唔大，西甲根本採取上述行動並無必要，甚至適得其反。
如今美斯已抵達巴黎，將會轉投巴黎聖日耳門。希望美斯同好兄弟尼馬再次愉快合作，踢得快樂，日後能否回歸巴塞，還看緣份。