〔美洲盃決賽: 阿根廷 1-0 巴西 比賽描述評論〕巴西單邊問題再現 半場調動立竿見影 阿根廷應對快而準 不惜力氣奮鬥下最終圓夢

美洲盃決賽,阿根廷同巴西嘅夢幻對決於馬拉簡拿球場上演,最終阿根廷以1-0小勝巴西,成功打破28年嘅錦標荒,奪冠圓夢。

阿根廷穩守反擊,調整應對相當之快
面對人強馬壯嘅巴西,阿根廷賽程、體能同平均實力方面都處於下風,屬被動一方。阿根廷主要集中於中至中後場搶奪,一直維持緊密嘅隊形。上半場早段,兩隊集中中場搶奪,其後隨巴西漸漸壓前,阿根廷球員亦多加回防穩守,調整應對相當之快。

巴西單邊問題
一如之前文章提到,尼馬今場再次以左翼身份上陣,但於其角色實情為進攻中場,令巴西只有右翼艾華頓拉邊,令破密集效果被打折扣。

迪馬利亞分擔美斯引球工作
今場巴西隊對美斯嘅限制效果不錯,美斯受卡斯米路、費特等人包夾,難以活動。史卡朗尼安排迪馬利亞正選於右路幫助美斯分擔唔少引球向前嘅工作,對阿根廷守轉攻/運送方面有唔少幫助。

迪保羅破解巴西中線防守,迪馬利亞不負所托
巴西未有控球權之時,進攻球員主要付責前場壓迫。不過當巴西減少壓迫,四位進攻球員中,艾華頓、尼馬、柏基達會回到中場線,阻止阿根廷以短傳打過半場。此時,迪保羅回後場接球,無人壓迫下一腳長傳,越過中場線,巴西左閘洛迪攔截失敗,形成迪馬利亞單刀,迪馬利亞不負所托,巧妙笠入。

巴西加強火力
巴西落後之下,教練泰迪半場以費明奴入替費特擔任正前鋒,將艾華頓調到左翼位置,李察利臣調到右翼位置,形成兩翼拉邊,尼馬同柏基達成為雙攻中。左右拉開足夠空間之下,李察利臣以其衝擊力,製造唔少威脅,包括52分鐘嘅炸糊,以及54分鐘嘅勁射,阿根廷憑馬天尼斯撲救,才力保不失。

史卡朗尼調動準確
面對巴西加強火力,阿根廷教練史卡朗尼調動相當準確。先於防中位置以洛迪古斯入替柏利迪斯,其後於左路位置,以達利亞費高入替盧施素。達利亞費高嘅入替,俾到正選左閘艾簡拿唔少支援,效果有如雙左閘,能有效抵擋巴西右路嘅衝擊。到比賽尾段,史卡朗尼用攻防兼備嘅中場干沙利斯,入替馬天尼斯,進一步加固防守,抵擋巴西一浪接一浪嘅攻勢。

每人跑多幾步
阿根廷球員面對巴西,不惜以犯規戰術阻止巴西推進。除戰術之外,更重要嘅係,阿根廷每位球員都不惜力氣堅持跑動,34歲嘅美斯到比賽尾段仍不斷奔跑壓迫。阿根廷每人跑多幾步之下,得以維持緊密嘅防守以及中前場壓迫嘅力量,令球隊於體能劣勢下仍能同巴西抗衡,保住勝局直到完場。

再次恭喜阿根廷奪得美洲盃冠軍。經歷幾次決賽,幾次無限接近冠軍卻錯失良機,今次終於由迪馬利亞成功把握機會入波,一圓美斯、阿根廷職球員以及球迷們嘅夢想。美斯於國家隊經歷幾次決賽落敗,仍不斷堅持追夢,如今終於帶領國家隊捧起獎盃,相當勵志。完場哨聲響起,阿根廷圓夢一刻,兄弟們衝向美斯慶祝嘅嘅畫面,令人不禁動容。


具有經驗嘅美斯、迪馬利亞、阿古路、奧達文迪,連同羅美路、兩位馬天尼斯等正在走上生涯高峰嘅兄弟們,於一年半後卡塔爾世界盃嘅發揮,值得期待。

留言


請按此登錄後留言。未成為會員? 立即註冊
    快捷鍵:←
    快捷鍵:→