〔美洲盃〕阿根廷圓夢故事: 從前落敗同考驗令勝利尤其可貴 永不放棄追尋夢想 精選

阿根廷贏得美洲盃冠軍，球王美斯成功帶領國家隊圓夢，打破長達28年嘅錦標荒。大多球迷都為美斯帶領阿根廷捧盃而感到高興，可見今次勝利，尤其可貴。美斯於阿根廷國家隊嘅日子，好比一個包含起承轉合嘅故事。
漸漸冒起
十幾年前，當美斯漸漸冒起，便成功為阿根廷贏得05年世青盃冠軍，以及08年奧運金牌。想必當時嘅球迷，定會期待美斯於國際賽大展拳腳。誰知十幾年來，阿根廷有一次又一次無限接近冠軍，卻未嘗到冠軍滋味。07年美洲盃決賽，阿根廷面對巴西大敗三球。

黃金一代
10年世界盃，阿根廷黃金一代羅美路、馬斯查蘭奴、迪馬利亞、希古恩等球員開始擔任主力。上一代球王馬勤當拿擔任主教練帶領下，阿根廷於八強四球慘敗德國。

高峰期卻接連落敗
阿根廷黃金一代走向生涯高峰期，卻於14年世界盃加上之後兩次美洲盃，連續三次大賽屈居亞軍，非常可惜。16年美洲盃落敗後，美斯痛哭落淚，宣佈退出國家隊，可見壓力與打擊之大。
衰落
18年世界盃，主力年幾漸大，球隊表現下滑，差點連分組賽都未能出線。當年美斯被指於比賽中唔夠積極，而實情更似係戰術渾亂，難以適從，令美斯難以發揮。其後隨黃金一代年華老去，唔少球迷心灰以冷，漸漸接受無法打破冠軍荒嘅宿命。

重燃希望
隨黃金一代年華老去，阿根廷國家隊迎來新一代嘅球員，馬天尼斯、迪保羅、柏利迪斯等球員成為新一批主力。19年美洲盃，於教練史卡朗尼帶領下，阿根廷四強不敵巴西。雖然再次落敗，但美斯認為球隊表現能帶來挑戰冠軍希望。

決心追夢
球隊經過兩年時間成長，加上門將馬天尼斯、盧施素、高美斯、羅美路等人才兩年間於球會證明自己，入選國家隊，今屆美洲盃，具大賽經驗嘅美斯、迪馬利亞、阿古路、奧達文迪連同一眾逐漸成熟嘅兄弟，再次追尋冠軍夢想。
連場大戰
今屆阿根廷因疫情而放棄主辦權，主辦權落在其宿敵巴西。阿根廷於分組賽頭兩場就要面對智利同烏拉圭，兩場大戰一和一勝。於教練史卡朗尼細緻嘅部署下，球隊踢法未算亮麗，但實而不華，加上美斯頂級嘅表現，球隊住住能穩中求勝。其後兩場分組賽面對巴拉圭同玻利維亞，以及八強對厄瓜多爾，阿根廷都能順利過關。

挺身而出
去到四強，面對哥倫比亞，美斯早段轉身助攻馬天尼斯打開記錄。不過其後受制於對方嘅犯規戰術，球隊未能再入一球，尾段更被對方一個快攻迫和。互射十二碼階段，門將馬天尼斯挺身而出，連救三球，將阿根廷送入決賽。

終極一戰
決賽面對人強馬壯嘅大熱門兼主場球隊巴西，阿根廷嘅賽程、體能同平均實力都處於劣勢，而近年往續亦一面倒有利於巴西，賽前普遍球迷看好巴西衛冕成功。比賽中，阿根廷以穩守突擊嘅取態應戰。上半場一次反擊，迪保羅放長傳助攻迪馬利亞單刀笠射破網，成功把握僅有嘅機會。其後面對巴西搶攻，阿根廷眾將共同抵擋對方一波接一波嘅攻勢。不論壓迫定回防，每人都多跑幾步，令隊形足夠緊密，巴西難以撕破防線。最後阿根廷成功保住勝局，贏得美洲盃冠軍。
落敗令勝利尤其可貴，永不放棄追尋夢想
追夢路上，總會遇到挫折。擁有球王美斯嘅阿根廷亦都一樣。阿根廷甚至於高峰期間，都未能嬴得大賽冠軍，更要連續三年屈居亞軍，冠軍荒有如宿命。18世界盃過後，黃金一代年華老去，阿根廷嘅冠軍夢想似乎遙遙無期。

不過，球王美斯並無因此放棄，反而一直努力地保持狀態，到今年34歲之齡-正常而言職業生涯走下坡嘅年齡，延續球王級表現帶領國家隊走上冠軍寶座，自己包辦神射手以及賽事最佳球員獎。美斯於巴塞贏盡一切，但帶領阿根廷成功圓夢之時，其激動嘅表現，前所未見。經歷過從前嘅失敗以及重重嘅考驗，令阿根廷今次勝利尤其可貴。阿根廷今次勝利，除打動無數球迷，亦係一個經典嘅勵志故事。當大家於追夢嘅路途上若感覺絕望，不妨回顧美斯嘅經歷。