〔歐國盃決賽〕 「條條大路通羅馬」定還是「足球正在回家」? 意大利勢維持踢法 英格蘭可穩中求勝 精選

歐國盃經過一個月激烈嘅競爭，今晚將迎來終極一戰。殺出重圍嘅兩隊，意大利同英格蘭將於溫布萊球場，一決高下。
意大利勢維持踢法
先講主隊嘅意大利。球隊每場取態相似，偏向進取，以快速而緊密嘅組織，爭取入球。上一場面對西班牙，快打快之中，中堅兩老基亞連尼同邦路斯嘅行動速度較慢，被對方以快速壓迫針對，守轉攻出現問題，但今場決賽反而未必要太過顧忌，因為英格蘭箭頭哈里簡尼速度一般，中堅兩老所受壓力將會較少，相信會文仙尼會選擇維持一貫踢法。

意大利進攻方面，基艾沙於淘汰賽表現出眾，衝擊力強，今場有可能於英格蘭左閘梳爾壓力助攻時，攻擊其身後空間，以速度越過補位嘅防守球員，製造機會。

英格蘭體能稍有優勢主場作戰嘅英格蘭，運轉速度比意大利稍慢。不過，體能方面，就算四強較對方遲一日作賽，但相信亦稍有優勢。原因如下:
第一，因為今屆歐國盃英軍除八強外嘅比賽，都於主場應戰。
第二，英軍於八強面對烏克蘭以及四強面對丹麥，大部份時間控球在腳，相比面對比利時同西班牙搶攻嘅意大利，體能消耗較少。第三，意大利淘汰賽曾經歷兩次加時同一次互射十二碼，英格蘭只有一次加時，未曾互射十二碼。

英軍較有條件打持久戰
今場決賽，英軍體能上比較有條件打持久戰，而防守能力亦無庸置疑，今屆暫時只失一球，有能力穩中求勝。英軍比賽早段不一定要急於向前壓迫，可以到比賽中後段，對方體力下降時壓上。若修夫基選擇以上述取態應戰，基亞利殊有機會繼十六強擊敗德國，再度成為奇兵。
英軍未必全場踢三中堅
英格蘭未必會全場以擊敗德國嘅三中堅應戰。踢到決賽，雙方體能都已經消耗唔少，今場比賽節奏，將會隨球員體力下降而減慢，雙方會有時間需要應付主攻陣地戰，面對密集，尤其上半場尾段同下半場中後段。英格蘭有可能先以三中堅應付上半場對方快速嘅攻勢，到下半場甚至加時(如有)再轉陣成433/4231打陣地戰。

意大利防守有保證
意大利體能上雖稍為落後，但當球隊收縮防守，中後場有足夠緊密度，加上後備進攻球員所提供嘅牽制力，以中堅兩老嘅防守意識同路數，有望守至加時甚至十二碼階段。

意大利或有十二碼心理戰術
講到十二碼，大家都會聯想到心態嘅因素。意大利四強對西班牙互射十二碼前，基亞連尼對艾巴特別熱情地交流，有可能係一種心理戰術，若意大利球員們廣泛應用類似交流方式，話唔定會引發英軍於大賽互射十二碼嘅陰影，彌補意大利自身於本屆曾經參與互射十二碼，提供了應對方法嘅弱點。
總結
歐國盃終極一戰，期待兩隊發揮應有嘅表現。究竟結局係「條條大路通羅馬」定還是「足球正在回家」，今晚三點，大家拭目以待！