〔歐國盃: 葡萄牙 2-2 法國 比賽描述評論〕法國嘗試更加主動 葡萄牙變陣見效 但未有「趁火打劫」 精選

歐國盃死亡之組第三輪大戰，上屆歐國盃決賽翻版，於唯一可以全場爆滿嘅普斯卡斯球場舉行，葡萄牙以2-2逼和法國。
今場比賽相當緊湊，早段兩隊謹慎之下尋找機會，到上半場中段開始於中場搶奪控球，節奏加快。

葡萄牙變陣出擊
上輪敗於德國後，葡萄牙教練山度士安排球隊由4231轉陣成433，收起般奴，以山齊士取替，另外亦以莫天奴取替卡華路成為正選。

山齊士覆蓋範圍、對抗性同防守能力高於般奴，更適合打大戰。山齊士正選之下，葡萄牙中場防守比之前緊密，能持續同法國抗衡。

中前場連接方面，莫天奴正選上陣能以其傳送能力，加上山齊士帶球上前，表現亦有提高。
葡萄牙拉鋸下領先，法國心態受影響
兩隊上半場一直處於拉鋸狀態。直到30分鐘，葡萄牙前場罰球打入禁區，法國門將羅利斯出迎打手鎚失誤，打中佩雷拉輸十二碼，C朗操刀領先。

失誤落後之下，法國球員心態不穩，失誤同犯規增加。

普巴兩球直線，賓斯馬梅開二度反超
普巴今場發揮良好，係今場關鍵人物，佢兩次精妙嘅直線傳球，助法國隊兩次於46分鐘44秒入波。上半場補時階段，普巴一記直線助麥巴比插入施美度同比比之間，左路halfspace嘅空位，施美度未能跟緊，於禁區內犯規，46:44，賓斯馬射入十二碼追平。

下半場早段，普巴中線附近再送精妙傳球，精準更帶有孤度，攻擊葡萄牙後線身後空間，今次到賓斯馬接應，於46:44單刀射入，法國反超2-1。
C朗發力迫和，葡萄牙未有「趁火打劫」
落後之下，C朗開始發力，曾高高躍起頭鎚攻門，僅僅斜出。到60分鐘，C朗左路突破，法國右閘高迪禁區內手球犯規，C朗頂住壓力再入十二碼為葡萄牙追平，避免球隊陷入出局危機。

下半場迪甘斯於左閘位置以迪尼入替黃牌在身嘅靴南迪斯，但迪尼入場不久便受傷退下火線，只能由拉比奧特客串。葡萄牙其實可以「趁火打劫」嘗試以快翼拉法施華衝擊法國左路，針對攻擊，力爭贏波，首名出線。而葡萄牙教練山度士選擇以擅長控球組織嘅般奴入替右翼貝拿度施華，般奴入場後主要於右路活動，並非移入中路，可見山度士傾向保持控球，力保不敗。

法國嘗試更加進取
法國今場嘗試更加進取，以4231陣應戰，中場杜利素主要於右路活動，客串右中場，主要作用為拉邊牽引對手，以及組織過渡，較少插前。衝擊對方防線嘅工作主要都係交俾麥巴比同賓斯馬。下半場嘅66分鐘，教練迪甘斯以高文入替杜利素，以雙翼齊飛，加上賓斯馬同基沙文於中路嘅陣法，面對收縮防守嘅葡萄牙，不久便製造出普巴射門，被柏捷斯奧救到中楣角。最後法國佔有優勢卻無功而返，兩隊打和 2-2。