〔歐國盃: 葡萄牙 2-4 德國 比賽描述評論〕德國決心要贏 打法針對葡萄牙 葡萄牙下半場總算找到合適排陣 精選

歐國盃死亡之組第二輪大戰，德國主場迎戰葡萄牙，以4-2勝出，得到重要嘅三分。
德國大力搶攻，壓制葡萄牙
經過上場嘅失利，德國眾將決心取勝，以強烈的壓迫，壓制葡萄牙。比賽頭十分鐘，皮球主要位於德國嘅前場，不久便有入球，但VAR介入下，入球被判越位而推翻。

葡萄牙反擊領先
早段受壓之下，葡萄牙一次反擊，貝拿度施華長傳俾祖達，祖達助攻俾快速插前嘅C朗射入空門領先，可見球員級數以及把握力。

葡萄牙排陣同取態不合，德國打法針對葡萄牙
葡萄牙雖然球員實力出色，但戰術方面卻被德國比下去。葡萄牙以4231陣應戰，陣型同人員都偏向進攻型，不過大部分時間未有壓前爭取控球權以充份發揮進攻實力，卻收縮防守。而收縮防守之中，亦未有像阿根廷般以緊密嘅隊形去彌補本身防守力嘅不足，阻止德國推進，進攻球員嘅回防未有足夠深度以提供防守緩助。
德國今場進攻嘅難度比上一場面對法國低得多，球隊四個入球皆以相似方式製造，首先於右路推進，再製造空位傳中到左邊插上嘅高辛斯射門/傳中俾插入中路嘅哈伐斯，從而入球。


細節上從上面來自 Whoscored 嘅熱圖中可見，哈伐斯、梅拿同基拿比三位前線球員集中於右路活動。加上右翼衛甘美治以及根度簡都喺右邊幫手組織，葡萄牙防守球員都需要跟隨偏向左邊(德國嘅右邊)，人數不足之下，右閘施美度被迫填補中路位置。因此，德國左翼衛高辛斯於左路未有受到太大限制，有唔少空間發揮，從而插入禁區接應右路傳中，製造入球。
葡萄牙調動後追近，找到合適組合
葡萄牙「守不穩」之餘，今場其實亦「攻不銳」。正選陣容中，貝拿度施華同般奴擅於面對密集，兩人速度唔算快，今場面對德國壓前進攻，葡萄牙進攻以快攻/反擊為主，整場而言，兩人未能發揮長處，表現一般，葡萄牙反擊造成威脅嘅次數甚少。

下半場當教練山度士陸續分別以山齊士、拉法施華同莫天奴，入替貝拿度施華、卡華路同般奴，轉陣433，提升球隊嘅速度同對抗性，葡萄牙得以同德國抗衡，更一度壓住德國。67分鐘，葡萄牙通過前場罰球，C朗助攻祖達追近。雖然隨德國教練路維調動加強防守，葡萄牙最後無力回天，但總算尋找到抗衡力強嘅排陣同人員組合。

死亡之組第三輪預期 : 第二輪分組賽過後，葡萄牙同德國有3分，法國有4分。已知F組第三名到十六強會對比利時或荷蘭，難度甚高。而F組第二名有機會要作客對英格蘭，或於英格蘭對捷克。只有第一名會比較輕鬆，對A/B/C組嘅第三名，即瑞士/芬蘭或烏克蘭。如果英格蘭獲得首名，F組三支強隊下一場就要力爭首名了。