〔美洲盃: 阿根廷 1-0 烏拉圭 比賽描述評論〕烏拉圭兩大鋒將未能發揮 阿根廷放下優勢 同時放下風險

美洲盃A組大戰,阿根廷一球小勝烏拉圭。賽後阿根廷與智利同得四分,得失球同對賽戰績都一樣,可以理解為並列榜首。而少踢一場嘅烏拉圭暫時未有分數落袋。

阿根廷以牽制力取得優勢
烏拉圭擁有華維迪、賓坦古亞、托雷拉加上迪拉古斯四人組成年輕且運轉力強嘅中場組合。防守方面,高甸同占美利斯座陣下水平甚高。進攻方面,兩位老大蘇亞雷斯同卡雲尼級數足夠有餘,但速度未足以牽制對手。相反,阿根廷收起同為前線老將嘅阿古路同迪馬利亞,以年輕嘅馬天尼斯正選以及干沙利斯正選,速度上有明顯優勢。開波早段,阿根廷壓上搶攻,烏拉圭未能抗衡,持續受壓。13分鐘,阿根廷於左路開短角球,美斯擺脫托雷拉再傳中,防中洛迪古斯頭鎚入波,阿根廷領先1-0。

烏拉圭缺創造力,兩隊拉鋸中阿根廷依然佔優
阿根廷領先之後減少壓迫,兩隊互相拉鋸。除速度之外,阿根廷於美斯帶領,加上盧施素同迪保羅輔助組織下,創造力亦比烏拉圭強。烏拉圭中場雖然年輕,但欠缺創造機會嘅人物,蘇亞雷斯同卡雲尼得到嘅供應不足,未能完全發揮。阿根廷有較多入球機會,其中17分鐘馬天尼斯近門嘅機會最接近拉開比分,可惜過唔到對方門將梅斯利拿。

卡雲尼禁區內倒地,球證團隊未有判十二碼
第26分鐘,卡雲尼於禁區內被洛迪古斯踢跌,球證第一時間未有吹罰,其後VAR球證團隊亦向主球證表示不需判十二碼。從慢鏡可見,未能確定洛迪古斯嘅 late tackle 有否接觸到卡雲尼腳徑位置使其倒地。但可見卡雲尼於疑似接觸後一刻,疑似被接觸嘅重心腳仍能保持平衡,可見有「插水」之嫌。

阿根廷放下優勢,同時放下風險
下半場,阿根廷大部份時間都選擇比較保守嘅取態,穩守突擊,未有壓前同烏拉圭對攻,未能充分發揮牽制力同組織力嘅優勢。

優勢未必能轉化為入球
值得留意嘅係,阿根廷雖然速度較快,創造力較好,但烏拉圭防守亦係堅固,阿根廷若果進取搶攻,其實亦未有太大把握能攻入第二球。

排陣攻強守弱
阿根廷排陣之中只有一名防中,另外兩位中場盧施素同迪保羅都偏向進攻型。阿根廷球員能力方面偏向進攻,未及對方嘅攻守平衡,若果對攻,體能快速消耗下,防守有機會出現缺口,增加被扳平嘅風險。

無必要冒險
上述因素加上本文前段提到烏拉圭欠缺創造力嘅問題,阿根廷領先之下唔需要冒險地於下半場早段花費更多體能搶攻,所以史卡朗尼選擇保守。烏拉圭下半場並無中目標嘅射門,唯獨於69分鐘烏拉圭左閘M.韋拿嘅傳中,卡雲尼差少少頂到。對阿根廷而言,防守效果算係唔錯。而進攻方面,美斯同後備上陣嘅迪馬利亞多番引領反擊,雖未能拉開記錄,但仍有足夠牽制力以控制戰局直到完場,阿根廷最終順利保住勝局。

留言


請按此登錄後留言。未成為會員? 立即註冊
    快捷鍵:←
    快捷鍵:→