2023女足世界盃十大回憶（下） 精選

🌍🌎🌏⚽️🏆👑
《2023女足世界盃十大回憶（下）》🇧🇷告別瑪達
除咗上半集提到嘅韋冰露 (Megan Rapinoe) 之外，巴西球王，被稱為「穿裙子的比利」嘅瑪達(Marta)亦喺今屆告別：「瑪達到此結束，世界盃再也沒有瑪達了。」佢喺訪問當中，亦不忘呼籲大家繼續支持女足。由2003年到2023年，六屆世界盃入17球，係男女子之中史上最多。20年間，由冇女足偶像，到成為人哋嘅偶像，瑪達喺記者會講起呢個變化時激動帶淚，係世界盃中另類嘅深刻回憶。

🇨🇦基斯汀冼佳亞只差一點創造歷史
加拿大傳奇前鋒基斯汀冼佳亞（Christine Sinclair），2000年開始效力國家隊，作為史上男女子國家隊入球最多球員（190球）。年屆40嘅佢，冼佳亞射手觸覺依然敏銳，可惜三場分組賽中幾次機會只差最後一腳（包括對尼日利亞嘅十二碼），差一丁點就能成為史上第一位喺六屆世界盃都有入波嘅球員。
🇦🇺森卡爾挺身而出
主辦國之一嘅澳洲亦有位傳奇射手森卡爾(Sam Kerr)，佢處於當打之齡(29歲)，可惜受傷患困擾，大家未能見到狀態最好嘅佢。由分組賽最後一場到八強，憑著主場士氣高漲，眾將爆發小宇宙之下連過加拿大、丹麥、法國三關。去到四強，面對更加強大嘅英格蘭，此時需要卡爾挺身而出。卡爾冇令球迷失望，曾長驅直進再射入世界波扳平，以一己之力喺澳洲球場燃亮希望。只可惜，佢做到一次做唔到第二次，澳洲再度落後之下錯失機會。

賽後訪問卡爾提到「我已經盡力返到賽場，如果喺世界盃期間可以訓練到五次以上，可能唔會錯過下半場嗰次機會。」不過卡爾亦講到：「唔能夠將所有責任歸咎自己，必須諗吓球隊所做到嘅啟發到成個國家……呢個係愉快嘅旅程，好榮幸嚟到呢度。」
🏴󠁧󠁢󠁥󠁮󠁧󠁿Football’s nearly coming home
上年贏得歐國盃過後，隊長莉婭威廉臣(Leah Williamson) 同射手美迪(Beth Mead)十字韌帶受傷，創造型中場姬比(Fran Kirby)因膝傷缺陣，另一位前鋒韋芝(Ellen White)同中場史葛(Jill Scott)急流勇退。失去幾位主將之下，雌獅們喺世界盃頭兩場表現欠缺歐洲冠軍嘅霸氣。好在域斯占士(Reece James)細妹羅倫占士(Lauren James) 狀態大勇。去到第三場，主帥域文(Sarina Wiegman)決定轉陣改以352/3412作戰。

根據門將艾普斯（Mary Earps）嘅講法，球隊之前冇特別練過三中堅踢法，可見教練團隊呢個決定非常果斷。6-1大勝中國，可見球員級數。去到淘汱賽，英格蘭先做好控球同防守，再嘗試反擊取勝，十六強面對尼日利亞瘋狂埋身肉搏過程頗為驚險，雌獅發揮一般下捱到十二碼再憑經驗晉級，到八強同四強分別對哥倫比亞同澳洲，「羅氏組合」羅倫漢普(Lauren Hemp)同羅素(Alessia Russo)都逼到對方失誤而得到入波，當然都有入靚波啦，例如四強面對澳洲東妮腳面勁射遠處網仔，仲有羅倫漢普過關斬將助攻羅素嘅入波。只可惜最後功敗垂成，僅僅不敵西班牙。
🇪🇦西班牙脱穎而出
西班牙曾於分組賽四球大敗俾日本，當時球隊只有差傳，欠缺變速同變化。可能因為咁，之後嘅比賽西班牙加入長傳嘅元素，令眾將能力得以發揮，奪冠亦係實至名歸。西班牙近年女足發展突飛猛進，由U17、U20國家隊贏得世青杯，到球會層面嘅巴塞成為歐聯冠軍，再到大國腳如今走上世界嘅巔峰，里程令人嘆為觀止。

地上最強嘅面貌，面對如狼似虎嘅英格蘭，幾碼之間嘅小範圍配合穩如泰山，組織方面變化多端，要打快攻亦極其銳利。哥迪奧拿(Pep Guardiola)形容中場艾坦娜(Aitana Bonmati)為「女版恩尼斯達」所言非虛，哪怕球后普迪耶絲(Alexia Putellas)未到最佳狀態問題亦唔大。艾坦娜亦係今屆賽事最佳球員！

另外不得不提嘅係卡莫娜(Olga Carmora)，四強重奪正選前仆後繼球球去盡，面對瑞典入世界波致勝，決賽一箭定江山，呢位來自西維爾嘅女仔，搖身一變成為國家英雌。決賽過後先知父親經已離世，悲喜交集之下，笑容似未退減，自己國家普天同慶之下，心裏有苦自己知。其後卡莫娜喺twitter 向亡父發文：「我知您俾我力量，達成獨特嘅事情。我知您今夜一直睇著我，知您因我而自豪。」「安息吧，爸爸。」 Forca Olga!!

今屆世界盃回憶，當然唔止十個，除咗剛剛提到嘅老將傳奇，後起之秀如哥倫比亞嘅卡絲度、西班牙嘅今屆最佳年青球員巴娜尤伊露…英格蘭嘅羅倫占士同埋喺澳洲中場擔大旗嘅古妮哥絲其實只係21歲。長江後浪推前浪係必然嘅事，女子足球越來越盛行亦然，希望以上提到嘅佢哋，第日會係家喻戶曉嘅球星。

小弟好高興，亦好榮幸能以口述影像評述員身份參與女子世界盃，由分組到決賽，陪大家見證女子足球歷史中重要嘅一頁。下一屆如果繼續有聲音直播，希望再有多啲人過嚟《開聲體》啦！