20-21球季 8個經典回憶


繼上一篇英超球季回憶,今篇趁歐國盃開鑼前,再來一個英超以外既球季回憶。

賽程極其頻密
上季因停賽期而延遲結束,接住就係今季既賽程,中間缺乏休息調整既時間。今季季初,由於聯賽加上歐國聯既比賽,球員舟車勞頓,欠缺休息,加上疫情,各隊都出現傷病同體能狀態問題。

AC米蘭意甲叫糊
自伊巴回歸帶領下,AC米蘭戰績提升,於今季既上半季一度佔據意甲榜首,可惜因伊巴、查漢洛古等主力受傷,強勢無以為繼。球隊最後奪得意甲亞軍,重返欠違既歐聯舞台,成績上有所突破。

球迷力量推翻歐超聯
歐超聯既出現引發極大迴響。有人認為歐超聯破壞足球運動,亦有人認為歐超聯有助抗衡長年腐敗既歐洲足協。由於歐超聯主辦球隊公關上未有足夠理由令人信服,而其賽制偏向主辦球隊,球迷紛紛上街示威。最後,除皇馬、巴塞同祖雲達斯外,各主辦球隊退出歐超聯,令其無法舉行。

意想不到既歐聯
今屆歐聯雖然冇18-19球季既瘋狂逆轉,但仍有唔少驚喜。淘汰賽初段,多數球迷以為拜仁能衛冕歐聯,但八強遇到「仇家」巴黎聖日耳門,尼馬、麥巴比同迪馬利亞大放異彩成功「復仇」成為冠軍熱門。不過,巴黎到四強隨即被曼城以較保守既踢法針對性擊倒。到決賽,滿以為曼城會維持穩中求勝既取態,但哥帥選擇冒險,最後「輸賭」落敗,車路士不被睇好下奪冠。

簡迪再創高峰
自杜曹成為車路士領隊,球隊成績反彈。杜曹擅於發揮球員特性,球員越踢越好。其中簡迪重回巔峰表現,中場掃蕩一夫當關,係車仔奪得歐聯冠軍既其中一個關鍵。簡迪於歐聯四強兩回合嘅比賽以及歐聯決賽,簡迪都獲得本場最佳球員(MVP)

國米相隔11年再奪意甲冠軍
國際米蘭自2010年贏得三冠王後,成績下滑,一度跌出意甲前四,於中上游徘徊,到近年開始回勇。上季干地上任,國米離意甲冠軍相當接近,今季下半季榜首帶開,最後終於得賞所願。

里爾大落大起 打破壟斷
近年法甲冠軍被巴黎聖日耳門壟斷,到今季由里爾奪冠。里爾十年前奪冠之後,2017-18球季,比爾沙執教下,里爾曾經需要護級,要現時既教練加迪亞季中接手,拯救球隊。其後,球隊下一季即刻返上前列,成為法甲亞軍。兩年後,今季終於重奪冠軍,不得不佩服加迪亞。

蘇亞雷斯復仇記
上個夏天,巴塞名將蘇亞雷斯遭到球隊嫌棄,巴塞禁止蘇亞雷斯參與訓練賽,將其逼走,以低價賤賣。
蘇亞雷斯轉投馬體會,交出頂級表現,助馬體會高居榜首。最尾兩場比賽,蘇亞雷斯兩次挺身而出,射入反勝既入球,令馬體會重登西甲冠軍寶座。蘇亞雷斯以表現證明自己,並一吐烏氣,除狠狠「復仇」巴塞之外,亦為球迷送上勵志既故事。

如小弟上一篇所講,特別既回憶造就獨特既球季。接下來,歐國盃同美洲盃將同時舉行,希望兩個大賽能順利舉行,球迷們能享受獨特既美好時光。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→