英超 「決賽」丨賽前分析 : 更快更極致 vs 更堅更全能

英超鬥到尾段，曼城同利物浦成功跑出。兩隊繼2018-19球季後，再次鬥得難分難解。今晚十一點半，兩隊正面對決，對爭冠形勢有著關鍵影響。美國Gracenote電腦分析指出，若曼城贏波，其奪冠機率將會升至86%，若利記擊敗對方，其奪冠機會則會升至68%。一場比賽擁有如此嘅影響力，難怪球迷們都非常期待。
今場對決前，雙方教練哥迪奧拿同高普各有安排輪換，於體能方面花了心思。曼城方面，阿古路所講嘅關鍵人物科頓，對上兩場分別只踢了64分鐘同22分鐘。利記嘅沙拿同文尼，對上兩場合計上陣時間，分別只係130分鐘同82分鐘，而祖達上場只踢了21分鐘。

講到體能，曼城今場嘅條件更勝一籌。首先曼城接連於主場迎戰，交通路程明顯較短。其次曼城球員如科頓、基亞利殊、史達寧、迪布尼等，於國際賽嘅體能消耗較少，反觀利記嘅沙拿、文尼、祖達同路爾斯迪亞斯都要參與世界盃外圍賽嘅最後階段。曼城擁有體能優勢下，球隊嘅衝擊同對抗能力，以至整個運作速率相信會更強更快，有利於互相對攻抗衡中製造更多機會。
曼城雖有體能優勢，但陣容不及利記完整。統領後防嘅魯賓迪亞斯因傷缺陣之下，球隊防守能力不及利記，利記嘅進攻較易得到收穫。

就算一場比賽節奏點樣激烈都好，點都會有陣地戰嘅時間。曼城應付主攻陣地戰嘅地面組織能力，可謂極致，其攻擊火力毋庸置疑。

利記方面，球隊組織能力雖不及曼城，但其爭取入球嘅手法更加豐富。死球攻勢係利記嘅一大武器，球隊於英超80次以死球製造機會，係全英超最多。利記另一個進攻武器，就係兩閘傳中，尤其阿諾大熟大勇。阿諾右路傳中，供祖達或從左路斜插嘅文尼迎頂，勢會帶來威脅。

不論對攻抑或陣地戰，曼城同利物浦兩隊各有優勢，勝負確實難以預料。或者我哋只能預料，兩隊會踢得精彩而緊湊，至於結果，就真係要睇過先知。如果要估一個比數，小弟認為兩隊會踢成2-2。