英超丨賽後短文 : 絕殺 ! 眾將表現有好有壞,利記幸而獲勝 (利物浦 2-1 紐卡素)

英超快車賽程上演絕殺好戲 ! 利物浦主場反勝紐卡素 2-1。
雙方陣容 :

利物浦上場大勝振奮士氣過後,今場精神面貌有所改善。面對同樣受傷兵問題困擾,欠缺辛麥斯明同般奴甘馬雷斯嘅紐卡素,利記防守考驗較想像中少。

球隊今場整體狀態可以,迪亞斯、費明奴同艾利洛表現相對突出,其中艾利洛成為今場MVP。三人曾合力從中路製造黃金機會。可惜迪亞斯推過門將普比後,面對查比亞護空門而拗腰發力炒飛機。

至於右路嘅沙拿同阿諾就狀態一般,球隊今場右路配合失效,面對密集便遇上煩惱。沙拿上場已頻頻失機,而今仗就未能突破右路。阿諾狀態低迷,傳中質素不及以往,防守方面無須面對辛麥斯明可算幸運,下半場亦少有地喺70分鐘就被換出。上半場阿諾轉邊失誤,輾轉就俾到唯一一個明顯機會俾紐卡素,新加盟嘅伊沙克把握得到,射入自己嘅英超處子球。利記半場落後0-1。
下半場紐卡素大部分時間全軍退守,其451隊型非常緊密。利記好在把握到少有出現嘅快攻空間而製造到入球。法賓奴靚牌牌劏穿中場,艾利洛串連上前俾到沙拿,沙拿今次就唔選擇自己突破,而係引球拖向底線拉開空間再等待時機,助攻後上嘅費明奴入禁區燙遠處網仔迫和。

其後利記持續圍攻,但顯得老鼠拉龜。值得一提,迪亞斯尾段嘗試奔走到各個區域引領攻勢,爭勝決心可嘉。

眼見快將握手言和之時,利記憑最後一擊角球攻勢,渾戰之下由後備入替嘅卡華路絕殺,最終利物浦驚喜地獲得兩連勝。

踏入九月,英超賽程加上歐聯展開之下,利記將迎來一周兩賽嘅日子,對於體能而言,相信又會係一大挑戰。

希望大家多多支持!撳多幾個掣,俾多幾個鼓勵!(例如「訂閱」掣,同埋follow IG: @football_era_talking 觀看更多短文/story分享)
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→