英超丨賽後文章 : 高手過招叫人目不轉睛 曼城更加銳利 利物浦更有效率 (曼城 2-2 利物浦)

英超爭冠關鍵一戰,曼城於伊帝哈德球場迎戰利物浦,最終兩隊繼首循環之後,再次以2-2握手言和。
雙方陣容 :

⛵️🔴體能狀態
曼城今場嘅體能條件更勝一籌。首先曼城接連於主場迎戰,交通路程明顯較短。其次曼城進攻球員科頓、史達寧、捷西斯、迪布尼,於國際賽嘅體能消耗較少,反觀利記嘅沙拿、文尼、祖達同路爾斯迪亞斯都要參與世界盃外圍賽嘅最後階段。

⛵️早段領先
開波第4分鐘,迪布尼禁區外遠射省中馬迪普,皮球飛向球門內柱彈入,似乎幸運女神傾向曼城一方。

⛵️銳利進攻帶來威脅
雖說曼城入球帶有運氣,但絕對不能否認球隊嘅發揮。上半場曼城多次以高波長傳/快攻,衝擊利記防線身後空間,如早段史達寧就有一次黃金機會。另外,簡些路喺阿諾嘅位置亦嘗到甜頭,曾經接應長傳製造迪布尼射中柱嘅機會。

哥迪奧拿嘅部署充足利用了迪布尼、簡些路、洛迪等球員嘅較炮能力,同前線球員嘅體能狀態。科頓、史達寧同捷西斯嘅銳利度,為對方帶來了唔少威脅。

🔴兩翼狀態未算突出還有兩閘助攻
利記亦有快攻/反擊,但由於前線體能狀態對比曼城稍有不及,所以快攻/反擊次數較少。祖逹曾突破曼城防線,更同沙拿形成了二打一機會,可惜一瞬間嘅猶豫令其未能把握。利記上半場衝擊效果一般,不過於陣地戰之中,就能透過左右嘅轉移加上兩閘傳中製造入球。堤亞高一記長傳至右路發動攻勢,皮球輾轉去到左路,羅拔臣斬到後柱,俾到阿諾於右邊底線助攻祖達入球扳平。雖然今場沙拿同文尼兩翼體能狀態連同其銳利度未算突出,但身後仲有阿諾同羅拔臣兩閘嘅助攻,足以為球隊帶來入球板斧。

⛵️把握時機突破越位
利記一貫習慣推高防線,其越位陷阱相當熟練。不過,今場部署用長傳攻擊嘅曼城,球員往往能把握時機前插,可見球員嘅執行力極高。從死球攻勢更加可以欣賞到呢一點,如24分鐘嘅罰球攻勢,洛迪第二時間插入禁區頭槌二傳至門前,可惜史東斯不及接應。35分鐘,左路角球延伸嘅二次進攻機會,捷西斯從後插入阿諾盲眼位,突破越位直入禁區射入,助曼城再度領先下完成上半場比賽。

🔴半場調整見效
半場15分鐘休息調整之中,高普作出了一連串嘅調整,令下半場球隊戰局得到改善。首先,下半場阿諾回防表現明顯提升,相信係因為高普嘅提醒。球員半場回氣之後,下半場早段發力壓迫搶攻。

利記進攻方式同上半場亦有不同,上半場球隊多以長傳、左右路轉移同兩閘傳中攻擊對方,下半場高普安排球員更多向前傳送,亦增加從右路進攻,安排沙拿更多上腳持球制造機會。開波不久,沙拿從右路以一記斜直線傳球,助攻文尼入球再度扳平,其後一次快攻,沙拿將球送到中路俾到祖達,可惜其鏟射未能轉化成反超嘅入球。下半場開始至52分鐘之內,利記佔據優勢,控球率高於曼城,就喺呢短短嘅幾分鐘,球隊製造到追平同反超嘅機會,效率甚高。

⛵️🔴互相拉鋸之中,曼城換人效果更顯著
曼城上半場多次以長傳衝擊對方防線,球員多次衝刺,體能消耗龐大,令球隊下半場以長傳製造機會嘅次數減少。隨利記下半場發力一段時間過後,兩隊處於互相拉鋸嘅狀態。

下半場中段,兩隊各有調動。先係利記嘅路爾斯迪亞斯入替祖達,其後曼城嘅馬列斯入替了史達寧。迪亞斯被速度同身體質素兼備嘅獲加限制住,發揮一般,而馬列斯發揮更好,令曼城更加接近贏波,可惜佢一次罰球射中柱,一次接應迪布尼妙傳笠射高出。最終兩隊以2-2握手言和。

⛵️🔴總結:高手過招叫人目不轉睛
兩隊完全成熟嘅強隊比拼,戰況非常緊湊,每一下傳送、接觸、對抗都可能成為關鍵,今場高手過招實在叫人目不轉睛。兩隊唔似有固定嘅取態,但喺壓迫同收縮防守之間,往往進退有度,收放自如,可見兩隊球員對於整體戰術,有極高嘅執行能力。曼城發揮到體能優勢,以更銳利嘅進攻製造了更多機會。利物浦則以唔同方式進攻,打出了進攻效率,高普連同教練團隊於半場嘅調整亦係關鍵。

⛵️🔴爭冠預期:利記考驗比想像中小
兩隊正面對決過後,曼城於積分榜依然領先利物浦1分,接下來七場比賽,兩隊都不容有失。利記接下來嘅賽程包括面對曼聯同熱刺兩場大戰,而曼城接下來英超並無大戰。不過值得留意嘅係,曼聯士氣同狀態低迷,而且曼聯同熱刺面對利記時,分別都有對決阿仙奴嘅後顧之憂。相比之下,相信兩隊會更加着重面對阿仙奴嘅爭四大戰,而面對利記時未必會出盡其九牛二虎之力。利記賽程中對手雖然較強,但考驗未必有想像中大。英超最終冠軍誰屬,懸念依然頗大。

如果喜歡我們的文章,請即分享到︰

標籤: 英超  曼城  利物浦  哥迪奧拿  高普  迪布尼  捷西斯  沙拿  文尼  

留言


請按此登錄後留言。未成為會員? 立即註冊
    快捷鍵:←
    快捷鍵:→