英超丨賽後文章 : 阿仙奴利物浦取態相似 堤亞高兩次傳送製造關鍵對比 (阿仙奴 0-2 利物浦)

英超週中大戰,阿仙奴主場以0-2不敵利物浦。

雙方陣容 :

🔴⚪️🔴體能狀態
上一輪比賽後,利物浦比阿仙奴有多一日休息調整時間。不過阿仙奴今季沒有歐戰壓力,長期嘅體能消耗比利物浦少,而且今場擁有主場之利,相信其體能狀態相比利記有過之而無不及。

🔴⚪️🔴踢法相似
上半場兩隊踢法相似,早段互相向前壓迫。面對對方嘅壓迫,兩隊亦不約而同地傾向以長傳攻擊對方。阿仙奴會嘗試牽引利記隊形偏向一邊,再攻擊其弱側,如14分鐘球隊於右邊後場組織後,加比爾長傳輾轉製造馬天尼利左路突破送到門前嘅機會。利記較多攻擊對方防線身後嘅空間,唯效果一般,可見阿仙奴嘅壓迫有效。利記要到完半場前一次反擊,先製造到阿諾斬俾文尼突破越位嘅機會,可惜文尼可能係因為天雨影響,而令其射門高出。

🔴⚪️🔴陣地戰
到上半場中段,雙方減少壓迫,更多時間處於陣地戰。阿仙奴較多以沙卡同馬天尼利嘅速度同活力進行兩翼側擊,但未足以突破利記防線。

利記喺陣地戰之中,一貫地以自己熟練嘅方式製造威脅,早段連續幾次角球攻勢,面對今季未失過角球嘅阿仙奴,雲迪克嘅頭槌僅被藍斯度撲出。面對阿仙奴轉成442陣型嘅密集防守,利記上半場多以右路三人組配合,嘗試滲入阿仙奴防線,但效果一般。沙拿剛剛傷癒而先列後備之下,今場由文尼擔任正選右翼。文尼同軒達臣、阿諾兩人喺右路配合嘅熟練程度,始終難及沙拿在陣嘅時候。

🔴⚪️🔴堤亞高兩次傳送製造關鍵對比
下半場早段兩隊持續拉鋸,堤亞高兩次傳送成為關鍵。堤亞高一次回傳失誤,被拿卡錫迪截到而製造奧迪加特禁區內大好機會,被艾利臣挺身而出封阻其射門。不久之後堤亞高到中線附近,送出極其通透嘅傳送,打穿阿仙奴前中後三線俾到祖達,祖達窄位推射近柱入網,藍斯度未及轉換重心而未能作出撲救,利記就此領先。入球過程中,文尼走位牽引對方中堅賓韋治,為祖達製造接應空間,亦應記一功。
堤亞高兩次傳送所發展出兩隊各一嘅機會,從中對比各自嘅處理同撲救兩方面,可見利記球員發揮嘅級數更勝一籌。
🔴「埃及文明」
56分鐘,高普連換兩人,以沙拿同費明奴入替迪亞斯同祖達。調動令利記前線體能得到補充,更重要嘅係形成返沙拿、文尼同費明奴嘅「埃及文明」組合,前線嘅默契隨之回歸。調動後利記隨即壓住阿仙奴,6分鐘過後,利記圍攻之下,羅拔臣喺左路反搶皮球後助攻費明奴拉開記錄成0-2。
🔴⚪️無力回天
利記領先兩球下,可以減少壓迫搶攻,更多將隊形收緊,而阿仙奴則需要搶攻。阿仙奴繼續執行兩邊突破,但始終只能依靠馬天尼奴嘅個人能力製造威脅,不足以製造入球,最後亦無力回天。

🔴⚪️🔴總結
今場比賽阿仙奴未能以其體能同活力為利物浦帶來衝擊,而利記就遂漸以其球員能力同板凳深度取勝。阿迪達今場所安排嘅戰術取態以及某些踢法都同利記相似,比賽過後從數據上可見,阿仙奴形勢上不落下風。不過,就係喺相近嘅形勢下,利記贏在班底同球員級數嘅發揮。

🔴⚪️🔴各有目標
比賽過後,利記同曼城喺聯賽榜嘅差距收窄至1分,直逼對方。利記餘下嘅英超賽程難度比曼城高,曼城只剩下兩隊正面對決嘅一大考驗,而利記除此之外仲要面對曼聯同熱刺。利記要趕過曼城,必須咬緊牙關。利記於歐聯八強抽中賓菲加,係一個好消息,相比曼城要面對馬體會,球隊未來喺歐聯嘅體能壓力想必較小。

阿仙奴雖然落敗,但仍然處於第四位,踢少兩場之下領先曼聯1分,踢少一場之下領先熱刺3分,分數上有優勢。加上阿仙奴今季沒有任何歐戰嘅體能負擔,令球隊體能狀態勝於曼聯同熱刺,就算同曼聯對決前少一日休息時間,相信仍有力保持不敗。總體嚟講,阿仙奴爭四前景依然樂觀。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→