英超首循環雙紅會，曼聯主場以2-1擊敗利物浦，獲得今季英超首勝。
雙方陣容 :
⚡️速率取勝
坦克及其團隊今場排兵布陣頗有亮點，面對受傷兵潮困擾，亦處於疲勞狀態嘅利記，曼聯正正能以速率取勝。兩隊差距頗大嘅衝刺數據（曼聯多利物浦51次），可以話係今場比賽嘅縮影。
球隊今場減少後場組織、前場壓迫等「主攻」做法，更多集中於中位壓迫同收縮防守。用波方面，由門將到前場，球隊傳送路線更加直接，有時結合前面一兩下配合，足以穿過利記中場，效果顯著。坦克將C朗收起，安排年輕而具活力同衝擊力嘅組合，伊蘭加、拉舒福特同辛祖作為前線正選，令進攻配合變化更多，亦更銳利。就如第一個入球，伊蘭加同艾歷臣撞牆突破入禁區，橫傳助攻辛祖射入。
🛡防守出色
防守方面，雖然般奴同艾歷臣同時正選之下，覆蓋率同對抗性未必足夠，但面對速率不足嘅利記，今場問題唔大。另外，曼聯無論中位壓迫定收縮防守，防守都具整體性，般奴做足回防工夫（3次攔截、3次截斷對方傳送、5次解圍，總數仲多過防中麥湯），兩翼辛祖同伊蘭加勤於回防，亦有助掩蓋中場缺點，堵塞對方組織空間。面對利記嘗試從邊路突破/滲入，曼聯後防往往能緊貼對方，左閘馬拉斯亞同中堅馬天尼斯成功限制沙拿，大大減少呢位對方王牌嘅威脅。
上下半場嘅中後段，曼聯向前壓迫擴張嘅能力隨體能下降，因而漸漸收縮防守，利記得到唔少主攻陣地戰嘅時間，因而今場控球率佔七成。曼聯未有俾到太多機會對方，利記整個上半場都未有中目標嘅埋門，唯下半場馬天尼斯抽筋後防守上出現危機。值得一提嘅係，馬天尼斯、華拉尼、馬拉西亞、達洛、般奴等球員經常喺防守成功後互相擊掌鼓勵，對於受壓下保持士氣有所幫助。
🔥精神力量
今場雙紅會，曼聯體能同精神面貌都勝過利物浦，最終相隔四年再喺英超撃敗宿敵。上場大敗過後，坦克罰跑13公里嘅訓練似乎見效，曼聯要長期重回正軌，先要保持今場呢份決心。
🔴狀態低迷
利物浦開季至今狀態低迷，雙紅會對攻時欠缺速率，衝刺次數遠不及曼聯，兩個失波包含自身嘅失誤（第一球雲迪克判斷失誤、第二球軒達臣控失波）。到陣地戰時，近兩季大有進步嘅組織能力得以發揮，費明奴嘅串連帶來了創造力，但滲到入去，都係未能擺脫對方嘅緊貼防守，等到對方馬天尼斯抽筋後，總算能夠以沙拿嘅入波追近。🔴似層相識
利記今場以致今季頭三場嘅種種跡象似曾相識，都令小弟諗起球隊前季（2020-21）嘅經歷。同樣係上一季搏盡，同樣地季前備戰時間短，開季後同樣欠缺體能狀態，同樣遇上傷兵潮，睇嚟依家利記又有排捱。更甚嘅係，隊中主力年紀漸大，加上長年累月嘅消耗，速率同體能上開始走下坡並唔出奇。艾利洛同卡華路年輕有為令人安慰，不過睇怕FSG今夏唔會再作收購，唯有等待一眾傷兵復出，保持輪換一段時間，眾將先得以回復狀態。
英格蘭頂級聯賽百幾年歷史中，只有八隊頭三場不勝嘅聯賽冠軍。利記會唔會成為第九隊？小弟相信仍有可能！
歡迎大家支持本文合作夥伴 @redunited.hk
請按此登錄後留言。未成為會員? 立即註冊