英超丨賽後文章 : 入球同勝利得來不易 (韋斯咸 1-2 阿仙奴)

英超倫敦打吡,韋斯咸主場不敵阿仙奴1-2。今場比賽戰況非常緊湊,兩隊防守非常都非常緊密,入球同勝利得來不易。

雙方陣容 :

⚒🔴⚪️排兵佈陣
莫耶斯今仗排兵佈陣,有為周中嘅歐霸四強次回合作體能流放,收起了安東尼奧同蘇捷,由隊長盧保擔仼中場中,而正前鋒位置由保雲掛帥,另外中堅多臣因上場被罰紅牌而停賽。

阿仙奴陣容對比上場對決曼聯,有三個調整,左翼由史密夫路維換成馬天尼利,右閘富安健洋迎來復出後第一次正選上陣,中堅賓韋治因傷缺陣,由賀丁代替。

⚒🔴⚪️戰況
韋斯咸防守一貫緊密,包括於阿仙奴後防同中場線間嘅遮擋。阿仙奴用球組織並唔順暢,馬天尼利集中中路,令左閘泰華利斯時而陷入孤立無援之境。不過,馬天尼利集中中路絕對非一無是處,38分鐘嘅快攻中,馬天尼利於中路從旁牽引,幫助了尼基迪亞接應皮球再推到禁區頂射門搏到右路角球,從而間接製造賀丁頭鎚入球打開紀錄。

韋斯咸失球之後隨即搶攻,懷斯多次向前推進同引領攻勢,亦有一次頭鎚攻門被藍斯度飛身托出。45分鐘,懷斯於中路偏左長傳將波轉移到右路,右閘高法一控一窩利將波送入禁區,接應嘅保雲同樣一控一窩利射門省中加比爾入網仔,韋斯咸半場迫和1-1。

下半場初段。韋斯咸有較多時間作為主攻一方,佔有63%控球比率。阿迪達安排阿仙奴下半場大部份時間採用防反取態,限制了韋斯咸打快攻/反擊嘅空間。韋斯咸於主攻陣地戰中,多次嘗試以邊路三角配合滲入halfspace但未能成功,其後換入安東尼奧效果亦係一般,球隊整個下半場只有兩次射門。

相反地,阿仙奴嘅進攻更有效率,球隊下半場只有37%控球比率,卻能製造9次射門。52分鐘,沙卡接應長傳內切射門被法比安斯基救出,其後嘅角球所產生嘅二次進攻機會,馬天尼利傳中到遠處俾到加比爾頂入。再次領先後,阿仙奴眾將竭力回防,保持隊形緊密,力保不失,而尼基迪亞、馬天尼利、沙卡以及後備上陣嘅史密夫路維同時不斷嘗試維持牽制同威脅對方。其中沙卡連續兩場正選於右路瞻前顧後,不斷上上落落,最後受傷退下火線,值得掌聲。

🔴⚪️ 四場「決賽」
阿仙奴賽後於積分榜第四位領先熱刺兩分,今場硬仗嘅勝利,相信俾到球隊更多信心同意志力支撐埋餘下四場「決賽」,包括5月12號晚同熱刺嘅正面對決要力保不敗。

搏盡!
韋斯咸方面,經歷地獄賽程三連敗(包括上周面對車路士、歐霸首回合對法蘭克福同今場嘅阿仙奴),下場歐霸次回合作客法蘭克福將會係球隊今季最重要嘅比賽,好消息係法蘭克福周末嘅聯賽比韋斯咸遲一日踢,球隊有多一日休息調整時間。莫耶斯麾下嘅眾將幾攰都要搏盡!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→