美洲盃賽前精華 分組賽出線門檻低 但仍具競爭性 巴西大熱門 阿根廷有力一搏


歐國盃剛於周五晚開始,而緊接住美洲盃亦已經於今早開鑼。雖然美洲盃風頭不及歐國盃,但相信仍能吸引唔少球迷觀看。以下小弟將列出關於今屆美洲盃可以留意嘅地方。

分組賽出線門檻低 但仍具競爭性
美洲盃向來會邀請兩隊南美以外地區嘅球隊,而今屆美洲盃只有原本嘅十隊南美國家隊,並沒有邀請外隊參賽。今屆美洲盃只有兩組,每組五隊,兩組嘅前四名可以出線八強,換言之,唔包尾就可以出線。

今屆美洲盃分組賽出線門檻較低,似乎競爭性不足,不過,各隊期望出線之餘,亦會希望走線,避免淘汰賽早段遇到強大嘅對手。美洲盃八強組合會由兩個小組第一名對另一組嘅第四名,以及兩個小組第二名對另一組嘅第三名所組成,「走條靚線」嘅方法不外乎於小組力爭上游,因此美洲盃分組賽嘅競爭仍然激烈。

巴西人強馬壯 大熱門毫無疑問
人腳級數而論,巴西確實比較優勝。相對兩年前嘅美洲盃,已經成熟嘅尼馬回歸令人期待,前兩場世界盃外圍賽尼馬入兩球有兩個助攻,狀態良好。雲尼素斯今季大幅進步,有足夠能力成為正選,令巴西快攻/反擊速度比兩年前奪冠時更快。

巴西另一個明顯優勢在於球隊擁有頗大嘅輪換空間,中軸位置都有兩個可靠人選,例如門將有艾利臣以及艾達臣,中堅有堤亞高施華、馬昆奴斯、米列圖同菲利比,防中有卡斯米路同法賓奴。前線方面,捷西斯同李察利臣可以踢正前鋒或者邊路,排陣可以靈活調配。巴西最有條件於緊密賽程下保留體能,為四強同決賽建立體能優勢。

阿根廷更新換代,有力一搏
2018年世界盃之後,阿根廷人員逐漸更替。三年間,新一代球員如馬天尼斯、哥利亞、迪保羅、柏利迪斯等漸漸入選國家隊,並成為主力。

阿根廷近兩場世界盃外圍賽分別對智利同哥倫比亞,從兩場比賽中可見,阿根廷進攻組織能力同速度足夠,於美斯引領攻勢下,火力唔錯。後防方面,阿根廷實力一般,教練史卡朗尼適時會安排球隊收縮防守,提高防守緊密度,有一定效用。不過,阿根廷兩場比賽都被對方以高空攻勢迫和,高波防守令人擔心。

烏拉圭攻力一般
另一支強隊烏拉圭,後防依然有高甸搭擋占美利斯,中場華維迪、托雷拉同賓坦古亞足夠年輕,抗衡力足夠。進攻方面,烏拉圭於近兩場世界盃外圍賽未能入球,其中對委內瑞拉一戰,烏拉圭射門次數不及對方,可見火力一般。

兩隊黑馬看點
智利主力年紀偏大,前線山齊士、華加斯年過三十,兩閘Mena同Isla分別32同 33歲,速度有限,估計大戰中主要以保守取態應戰。

哥倫比亞主將占士洛迪古斯受傷之下,引領進攻嘅重任落在古亞達度身上。另外,效力阿特蘭大嘅前鋒沙柏達身高、力量同速度兼備,今屆可能有突出表現。

總結
今屆美洲盃嘅舉行經歷唔少考驗,包括疫情本身,以及隨之而來嘅接辦風波。希望賽事過程順利,球員們保持身體健康,發揮應有水準。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→