神奇領隊謝拉特丨戰述分析+初遇昔日宿敵記

開季至今,英超已有幾支球隊易帥,阿士東維拉係其中之一。由十月至十一月初,球隊遭遇五連敗,主帥史密夫隨即被解顧,取而代之嘅就係謝拉特。
執教生涯
謝拉特退役後,曾擔任利物浦U18領隊,到2018執掌蘇超球隊格拉斯哥流浪,上季帶領流浪相隔十年重奪蘇超冠軍。今季,謝拉特接任維拉領隊一職,令球隊成績明顯改善。
🦁接手維拉
阿士東維拉喺謝拉特麾下,以防反踢法為主,球隊喺多數比賽中只有四成左右嘅控球比率 (除面對諾域治同賓福特之外)。防反踢法之中,屈堅斯同積及藍斯,加上輪換正選嘅丹尼英斯同賓迪亞,都有足夠嘅速度推進反擊,衝擊對方防線。

🦁戰術運用
雖然球隊戰術取態保守,但亦不失進攻套路。當對方回防,球隊面對密集時,兩翼(或兩閘) 會拉邊製造空間,讓隊友進入對方中堅同閘位之間嘅halfspace位置突破或將波轉移至中路。面對水晶宮第二個入球,就係賓迪亞拉左邊持球牽引對手,拉開對方防線,再分波俾後上至halfspce位置嘅艾加斯助攻麥堅射入。其後面對曼城同利物浦嘅兩場大戰,尾段亦分別試過以同樣方法進攻,兩次都只差最後一射,就能入球扳平。

除此之外,死球亦係謝拉特麾下,維拉嘅武器。面對水晶宮打開記錄嘅入球、對李城嘅兩個入波,均來自死球。謝拉特上任至今,球隊以死球獲得兩場勝利,可見其重要性。
🦁初遇昔日宿敵
2022年嘅第二個禮拜,維拉分別於足總盃同英超兩戰曼聯。面對昔日嘅宿敵,謝拉特帶領維拉以防反踢法,限制了不擅面對密集嘅曼聯。兩場中三個失球,分別來自死球、門將馬天尼斯「牛油手」失誤,以及後場傳球失誤「送禮」,維拉收縮時,其防線甚少被對方滲入。

足總盃作客曼聯時,維拉曾以快攻同死球分別製造入球,可惜被判無效,最終僅輸一球。返到主場迎戰曼聯,上半場中段一次罰球攻勢,亦製造了近門嘅機會。
🦁可作調整
面對曼聯,維拉有唔少主攻陣地戰,面對密集嘅時候,謝拉特安排主要由兩閘拉邊,但效果一般。若安排兩翼更多拉邊,效果或會更好,一來可以促進翼鋒同閘位以及中場球員喺邊路配合突破,二來對方防守球員始終會對對方進攻球員更加提防,所以翼鋒拉邊更有牽引作用。

🦁立竿見影
下半場中段,維拉落後兩球之下,謝拉特果斷換入新加盟嘅攻中古天奴,造就了呢位舊隊友成為奇兵。古天奴首先喺禁區頂串連攻擊,滲入禁區助攻藍斯入球追近。到比賽尾段嘅一次攻勢,由前線嘅進攻球員賓迪亞拉左邊,牽引效果立竿見影,幫助了藍斯插入halfspace 接應傳送,助攻後上嘅古天奴門前射入追平。最終,謝拉特帶領嘅維拉喺曼聯手中搶得一分。
🦁值得期待
謝拉特以領隊身份初到英超,已經展現唔少嘅板斧,若果呢位「神奇領隊」能夠繼續吸收經驗,佢未來嘅表現絕對值得期待。

以下為足本圖文版,歡迎觀看同支持本文合作夥伴 @malffa_footballnews_hk !!
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→