「球王追夢隊」功臣逐個講-中場篇(2) : 忠實後盾 精選

「球王追夢隊」功臣系列，講完中場近邊線嘅兩位，今日輪到兩位中場中。
🇦🇷🏆安素費蘭迪斯
美斯嘅忠實球迷之一。2016年阿根廷連續第兩年不敵智利而屈居美洲盃亞軍，心灰以冷嘅美斯賽後宣佈退出國家隊。當年只有15歲嘅安素費蘭迪斯，曾經喺Twitter寫一篇長文挽留球王 (安素長文嘅中文翻譯版喺IG page @football_era_talking 早前嘅post度有)。
好在美斯選擇堅持落去，俾安素費蘭迪斯等到同偶像並肩作戰嘅機會。21歲嘅佢擁有年輕活力，亦有大將之風，用球/防守判斷冷靜。分組賽生死戰面對墨西哥，第五次為國上陣嘅安素後備入替，接應美斯傳送，再推入左邊禁區角對入五碼，單對單插花擺脫對手，右腳盪遠柱掛網而入。呢個係佢第一球國際賽入波，可見佢毫不怯場下嘅技術發揮。其後安素一路擔任正選，淘汰賽更場場踢足，證明佢年紀輕輕已經係可靠嘅大將。

🇦🇷🏆柏利迪斯
除迪保羅之外嘅另一位保鑣，喺對手或球證面前勇於為隊友出頭。蒙迪亞射入12碼，阿根廷圓夢一刻，柏利迪斯就係第一個衝埋去攬住美斯嘅球員，快過首席保鑣迪保羅，亦快過美洲盃決賽完場後第一個攬住美斯嘅阿古拿。

柏利迪斯喺用球，同控制節奏方面能力突出，防守同對抗時亦頗為硬淨。雖然唔係場場正選，但絕對係中場中位置堅強嘅後盾，面對波蘭、荷蘭同法國，後備入替抵擋對方唔少衝擊。佢四強面對克羅地亞正選上陣，面對對方摩迪、波索域同高華錫嘅頂級組合，表現亦係稱職。