球王圓夢丨經歷，成就最美好故事 精選

天才橫溢，自細出類拔萃而被上一代球王朗拿甸奴睇好嘅美斯，喺巴塞隆拿早已贏盡一切。
不過喺國家隊，美斯嘅故事正正相反。
06年第一次踢世界盃。
10年被德國大炒四球出局，經常被批評喺國家隊未能貢獻。
14年只差一步，同大力神盃擦身而過，只能默默歎息。
18年球隊表現強差人意，幾乎消沉得抬唔起頭。

傷心過，失望過，離開過，回歸過…
十六年嚟各種經歷嘅千錘百鍊，令美斯如今滿有王者風範。
改善飲食、改變內向性格、提高領導才能、變得更加有火、更信任隊友等等……可見美斯一直都有尋求進步。今日，面對極之峰迴路轉，堪稱史上最瘋狂嘅足球比賽。阿根廷由大好形勢，到被法國嘅年輕力量迫到懸崖邊，美斯都從容不迫，帶住眾將回過神來，自己亦喺加時階段再轟入一球。

阿珍奪冠，當然亦要歸功團隊內外嘅每一位。由教練、隊友、職員、球迷，以至競爭對手名宿，大家或多或少都凝聚於希望美斯圓夢。如果冇八年前屈居亞軍嘅經歷，或者就唔會有此情此境。

美斯堅持到35歲，表現依然超然，實在難能可貴。今個世界盃，佢用神級表現帶領阿根廷圓夢，同時帶領大家編寫美好嘅故事。
而故事寓意大概就係：堅持，真係得㗎！