《球星解密》分析球皇C朗拿度踢法及其變化


文: 時代的波經 Lee Keith
圖: MALFFA MANSON

2003年,C朗拿度從士砵亭加盟曼聯,經過費格遜幾年嘅栽培後,漸漸成為頂級球員。經過十幾年,由曼聯到皇馬再到祖雲達斯,以至葡萄牙國家隊,C朗踢法上有些少變化,但級數依然不變。如今強勢回歸奧脫福,勢要助曼聯重回費爵爺年代嘅輝煌。

年輕時期
先講C朗年輕時期開始嘅踢法。C朗大部份時間擔任左翼,不過其覆蓋範圍頗大,唔止勤於前後跑動,大家不時亦會見到C朗覆蓋埋右路嘅位置。

C朗擁有頂級嘅速度同技術,其帶球變速突破,不時可以令佢以一人之力入球,而更多情況係幫助到球隊將皮球運上前場,傳球俾隊友後便進入中路位置尋找機會。C朗非常擅長尋找接應最後一傳嘅空間,往往能擺脫對手,造就tap-in入球。

兩大進攻方法
除此之外,C朗有兩大「屈機」進攻方法。其一係遠射重炮,C朗左右腳都能發炮,若防守球員俾到C朗遠射嘅空間,可能隨即要付出代價。另一個「屈機」進攻方法,就係頭鎚,C朗彈跳力奇高,騰空時間亦比一般球員長,加上強大嘅核心力量幫助控制頂球方向,令其頭槌攻門極具威脅,有供應就有入球。

C朗嘅反擊亦係一絕,其速度耐力驚人,能從中後場從後趕上,並高速插入禁區。當C朗於較前位置接應反擊嘅傳送,佢就可以挑戰對方嘅防線,單刀直入。當年國家打吡之中,摩連奴放C朗喺前面打反擊令巴塞食咗唔少苦頭。

皇馬高峰
C朗效力皇馬嘅高峰期,有兩位前線好拍檔,賓斯馬同巴爾。三人組成BBC組合,BBC組合充滿默契,其進攻火力同巴塞美斯、蘇亞雷斯同尼馬嘅MSN組合不相上下。施丹上任成為皇馬教練後,於其4312陣型之中,C朗更多同賓斯馬打雙箭頭,到中路位置做支點次數增加,亦比之前更多與隊友配合。

進攻重心
去到祖雲達斯,C朗嘅角色同於國家隊時相似,係球隊進攻重心。不過,球隊以C朗為進攻重心難免令具有才華嘅球員如迪巴拿同般奴未能完全發揮作用,由於留喺正前鋒位置嘅時間相對較少,自身極其強勁嘅進攻終結能力亦未能有最大化嘅發揮。

強勢回歸
如今C朗重返曼聯,球隊進攻結構完整,由中場引領攻勢可以交俾般奴,邊路有辛祖、拉舒福特、普巴、格連活、連皇等人包辦。C朗可以正式成為正箭頭,球隊進攻組織嘅支點,頂喺最前頭頂腳踢,把握機會,佢嘅入球可能會喺困難嘅時刻,如面對密集久攻不下時拯救曼聯。

雖然C朗已經36歲,但從回歸曼聯至今嘅比賽中,可見佢完全能夠重新適應英超節奏,3場4個入球,可謂強勢回歸。以C朗嘅實力,加上極強嘅爭勝心,大家絕對可以期待佢帶領曼聯再提升一個檔次。

葡萄牙國家隊
國家隊方面,若C朗保持狀態,並將組織攻勢嘅工作放俾般奴等隊友,自己專注支點、埋門等「9號位」工作,能發揮極強嘅進攻終結能力,葡萄牙進攻火力將會更強,有望繼2016年歐國盃冠軍後,於2022年世界盃再創高峰。

以下為足本圖文版,歡迎觀看同支持!!
loading

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→