波係圓嘅 劍亦係圓嘅 其實夢想都係圓嘅丨感謝「劍神」張家朗為香港爭光 以金牌為香港人帶來歡樂同鼓勵


今個夏天嘅歐國盃,有兩場經典比賽,西班牙對克羅地亞,以及法國對瑞士,兩場峰迴路轉嘅大戰,印證資深體育新聞主播伍晃榮先生所講,「波係圓嘅」道理。

來到奧運,亦有類似嘅故事。本港花劍選手張家朗於八強比賽,面對俄羅斯劍手 Kirill Borodcahev,曾落後9-14,對方有六次決勝分機會。瀕臨出局邊緣之時,「劍神亅張家朗連得六分,絕地反勝,其後再擊敗捷克嘅 Alexander Choupenitch (四強),以及意大利嘅 Daniele Garozzo (決賽),奪得香港劍擊史上第一面奧運金牌,同時係香港史上第二面奧運金牌。

「波係圓嘅」道理,唔止係用於足球比賽,亦可以用於劍擊比賽。張家朗雖大幅落後,要連贏六分且不失一分才能出線,可謂「不可能的任務」。相信有觀看直播嘅朋友,當時已經準備迎接「劍神」八強止步了吧。不過,比賽未到完場嘅一刻,張家朗並無放棄,而係努力反撲,最後贏得一分又一分,拉近差距,繼而逆轉。

除了波同劍係圓嘅,其實夢想,都係圓嘅。
要喺香港追夢,確實困難,「正常」而言,大家從小應該好好讀書,入大學,搵份好工,為求未來賺取足夠財富,以負擔高昂嘅樓價同物價,享受美好嘅人生。環境嘅因素令上述思想根深蒂固,亦撲熄唔少人追夢嘅火。出到社會,大多數人都只能埋頭苦幹,所謂嘅夢想,頂多只算係與趣了。

依然努力追夢嘅你,可能正被現實環境壓迫得透不過氣,又或者你會感覺成功係非常之渺茫,甚至絕望。瀕臨放棄之時,不妨回望張家朗晉級嘅過程。要相信事情一日未完結,都會有逆轉嘅可能,依然努力追夢嘅你,要繼續努力,堅持。

「只要盡力、努力都一定可以做到,唔好放棄。」- 張家朗

最後,恭喜張家朗代表香港贏得奧運男子花劍金牌。於香港成為運動員非常難得,平時刻苦訓練、比賽之餘,張家朗更需要於中四時,放低學業。能夠打入奧運絕對係一大成就,而張家朗更贏得金牌。感謝「劍神」為香港爭光,以金牌為香港人帶來歡樂同鼓勵。

如果喜歡我們的文章,請即分享到︰

標籤: 波係圓嘅  張家朗  奧運  花劍  香港  夢想  伍晃榮  

留言


請按此登錄後留言。未成為會員? 立即註冊
    快捷鍵:←
    快捷鍵:→