歐聯丨賽後文章 : 馬體會具有效率但欠缺運氣 曼聯出乎意料卻遇到難題 (馬德里體育會 1-1 曼聯)

歐聯十六強第二週嘅比賽,曼聯作客馬德里體育會,以1-1握手言和。

雙方陣容:

🔴⚪️👹體能狀態
馬體會擁有主場優勢,而且球隊上一場比賽,比曼聯早一日進行,馬體會喺今場大戰前有更多休息調整同備戰時間,體能狀態較好。今場大戰中,施蒙尼選擇以三中堅陣迎戰,亦於比賽早段乘體能優勢向前壓迫,嘗試爭取入球。

曼聯喺上一場玫瑰打吡經歷激烈嘅雨戰,有損元氣,今場喺體能劣勢之下,主帥蘭歷克安排球隊首先保守作戰,希望以防反踢法穩中求勝。

🔴⚪️早段領先
比賽初段,馬體會一次右路角球攻勢後,獲得二次進攻機會,左翼衛洛迪推過費特後傳中,菲歷斯高速插前一頂破網,馬體會早於比賽第7分鐘領先。取得入球後,馬體會開始將隊形收縮於後方,減少向前壓迫,令曼聯需要面對密集。馬體會防守非常緊密,三中堅陣型之下,眾將集中於中後場進行防守壓迫,令曼聯組織空間甚少,難以創造具威脅嘅機會。

👹效果一般
上半場之中,曼聯主要從右路衝擊對方防線,早段拉舒福特擔任右翼,效果一般,後來同辛祖調位,效果亦都係一般,球隊始終未能從右路滲入禁區或落底線傳中。面對擁有體能優勢而集中防守嘅馬體會,曼聯難以破其密集。
退而求其次,使用較易執行嘅「燒味戰術」,於左右兩邊猜傳拉扯對方防線,再尋找空位傳中俾C朗發揮其頭槌能力,同時引發馬體會防線面對傳中偶有失誤嘅毛病,或者係更可行嘅進攻方式選擇。

👹出乎意料
蘭歷克安排連迪洛夫擔任右閘,出乎意料,亦係今場值得討論嘅地方。曼聯原本兩位右閘之中,達洛治本身攻強守弱,雲比沙卡不擅用球,用其正選上場,有機會抵受不了對方嘅壓迫而出現失誤。安排連迪洛夫擔任右閘,兼顧用球同防守,甚至加強了防空能力,係穩陣嘅選擇,亦乎合球隊原先保守嘅取態。

👹右路難題
不過,當球隊進攻上到前場,實在難以要求連迪洛夫提供強大嘅助攻力量,而防守方面,佢亦未能完全阻止對方。上半場尾段,馬體會一次罰球攻勢,連迪洛夫走漏洛迪,讓其傳中製造中門楣嘅機會。睇嚟球隊面對大戰時右閘位嘅調整同安排,仍會係蘭歷克及其教練團隊嘅一個難題。

🔴⚪️具有效率
經過15分鐘半場休息回氣,下半場初段,馬體會增加向前壓迫搶攻,務求再下一城,可惜未能增添記錄。
馬體會嘅壓迫同防反踢法效果良好,效率甚高,只有37%控球比率之下,創造唔少入肉嘅攻勢。不過,由於球員較長時間處於防守同壓迫嘅狀態,而曼聯有較多時間控球在腳,加上蘭歷克喺66-75分鐘果斷咁使用4個換人名額以補充體能,下半場中段開始,兩隊體能差距漸漸拉近,曼聯同馬體會各有攻勢但未算入肉。

🔴⚪️👹運氣主宰
直到80分鐘,後備上陣而體力充沛嘅伊蘭加,把握對方中堅文達華跣腳失位,接應般奴直傳推射入網迫和1-1。曼聯嘅入球帶有運氣,而馬體會於比賽尾段亦有入球機會,可惜基沙文射門不幸中楣,未能助球隊擴大比數。最終首回合兩隊以1-1打和。
👹🔴⚪️次回合預期
次回合嘅比賽,馬體會將作客奧脫福球場。曼聯雖有主場之利,但次回合前,馬體會比曼聯有多一日休息調整時間,而且曼聯喺次回合前兩場比賽,分別要應付對曼城同熱刺嘅兩場大戰,相信馬體會到次回合時仍有體能優勢。

次回合雙方體能狀態嘅前設預期同今場相似,馬體㑹於首回合大部分時間佔據優勢,未能取勝或多或少因為欠缺運氣,相信球隊會延續其戰術取態同踢法。而對曼聯而言,今場球隊嘅表現具有參考價值,蘭歷克及其教練團隊需要作出調整,包括上述進攻方式、右閘難題等。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→