歐聯丨賽前分析 : 馬體會佔先機 C朗能否再現球王本色? (馬德里體育會 vs 曼聯)

歐聯十六強首回合,曼聯將於週三晚上作客萬達大都會球場,面對馬德里體育會。兩隊近況一般,但都剛剛重回勝軌,想必令球迷更加期待今場C朗重遇施蒙尼嘅比賽。
💪體能狀態
先講體能方面,馬體會擁有主場優勢,而且比曼聯早一日進行上一場比賽,今場大戰前有更多休息調整同備戰嘅時間,相信體能狀態較好。面對今場大戰,相信施蒙尼會選擇以三中堅陣迎戰,亦會乘體能優勢向前壓迫爭取入球。

曼聯喺上一場玫瑰打吡經歷激烈嘅雨戰,必定有損元氣,今場喺體能劣勢之下,適宜保守作戰,以防反取態穩中求勝。

⚽️攻防部署
以下為曼聯預期陣型以及防守變陣:
後防方面,華拉尼加上麥佳亞嘅組合,相信能抵擋對方兩路傳中嘅攻勢。不過,馬體會嘅壓迫同快速組織,有力為曼聯帶嚟麻煩。曼聯中後場需要保持緊密,防線前方除麥湯文尼同費特之外,亦需要般奴同普巴回後保護,避免被對方嘅快攻或反擊直搗黃龍。

進攻方面,快攻或者反擊固然係其中一個方式,相信C朗、普巴、加上上一場休息嘅拉舒福特,仍能製造一定嘅衝擊力。

🔪「燒味戰術」
而另一種方式,就係喺或多或少嘅陣地戰時間當中,以「燒味戰術」設法讓C朗發揮其極強嘅頭槌攻門能力。馬體會防線不擅面對邊路傳中,常於中堅人數足夠時未能解圍,甚至未能找到防守目標。C朗嘅頭槌正正能針對馬體會後防弱點,呢個係佢往往能「剋住」馬體會嘅其中一個原因。

主帥蘭歷克上仗收起了泰利斯同達洛治,想必呢對比較擅長傳中嘅兩閘今仗會正選上陣。除兩閘以外,般奴可以上到右路傳中,而普巴可以串演左翼,於左路傳中。當球隊於右路進攻,普巴亦可以插入禁區利用其身高,作為傳中嘅第二個接應點,以防C朗被針對。

🗯總結
總括而言,曼聯今場於體能劣勢下宜以防反取態應戰,先做好防守,再尋找快攻、反擊以及用傳中針對攻擊嘅機會。今場作客馬體會,小弟認為曼聯保持不敗,係可以接受嘅。至於能否取勝,還看教練團隊同球員嘅發揮如何、C朗會否再現球王本色以及馬體會嘅表現。

歡迎大家支持本文合作夥伴 @redunited.hk
loading

如果喜歡我們的文章,請即分享到︰

標籤: 歐聯  曼聯  馬德里體育會  C朗  施蒙尼  

留言


請按此登錄後留言。未成為會員? 立即註冊
    快捷鍵:←
    快捷鍵:→