放榜日文章丨唔好因一個考試而定義自己 希望大家努力做自己喜愛嘅事 精選

2022年文憑試成績今日揭曉，考生有喜有悲。滿意成績嘅同學，恭喜你 ! 適逢放榜日，小弟諗起自己嘅經歷。成績相對一般嘅朋友，以下嘅內容應該啱你/妳嘅。
回想中學嘅時候，溫書同做卷都冇辦法保持專注。考試講求寫字嘅速度，而我寫字偏偏好似麥佳亞咁慢。呢兩個弱點，足以令我被身邊嘅一個又一個同學拋離。

小弟自問當時唔夠努力，但呢個未必係問題，問題係唔知點樣努力，努力唔到。本身從少唔太鐘意讀書，能力上亦唔太適合，被迫測驗同考試，等同被迫接受失敗。小弟當時讀書嘅心態，好比一支球隊長期受壓而打唔到反擊，動彈不得，試問邊度有動力？當時一日溫到5至6 個鐘，已經好叻仔，最後喺公開試科科合格，算係咁啦。

讀書欠缺動力，係因為自己未能迎合考試嘅要求。不過，呢一點或者令我更有動力去尋找自己喜愛嘅事情，嘗試努力做好佢，而呢樣嘢就係從少嘅愛好 - 睇波⚽。
有時睇完波，有好多野想講，但無咩人聽，索性將腦海裏面嘅嘢寫出黎🖋️。小弟有時比較懶，想寫得短短地，但最後篇文都會變到好長，哪怕寫到深夜甚至清晨⛅。小弟唔敢話自己有幾咁努力，但一定努力過以前嘅自己唔少。

老實講，如果我冇開始寫足球文章，我估我依家都唔會feel到點樣為之努力。而當中嘅動力，就係來自對睇波嘅熱愛。

欠缺動力，唔夠努力，一事無成，唔代表你唔掂，可能只係代表你未搵到一個能夠啟發自己，令自己願意全心全意付出嘅愛好。唔好因為一個考試而定義自己嘅好壞。小弟希望有一日，大家都能夠努力咁做自己喜愛嘅事情。