「折翼」之下難有優勢 轉陣出擊控制戰局

2022年一開始,車路士就要應付連場大戰,頭兩場分別係英超同聯賽盃嘅比賽,喺史丹福橋球場先後迎戰利物浦同熱刺。

🦁🆚🔴利物浦用防反踢法
今場利物浦領隊高普因確診而未能率領球隊應戰,其工作交由副領隊連達斯處理。面對擅長防反嘅車路士,利記今取態比平時保守,減少了前場壓迫,更多將隊形收緊,以防反踢法應付車仔。

🦁🆚🔴未能帶來優勢
車仔今場係比較主動嘅一方,曾經以壓迫令阿諾失誤製造佩利錫嘅機會。不過整體而言,由於速度快嘅兩位翼衛捷維爾同占士同時缺陣,車路士邊路衝擊力難免減弱,球隊進攻火力未能帶來優勢,倒反俾到利記唔少進攻嘅空間,文尼把握查洛巴失誤打開記錄,利記右路配合,助沙拿衝擊右路,推過阿朗素,再以「蕩遠柱」嘅腳法射近柱騙過文迪入波,利記一度兩球領先。
🦁🆚🔴連追兩球
上半場尾段嘅罰球攻勢,高華錫退後幾步到娥眉月頂窩利射門中內柱而入,技驚四座,亦提升了全隊以至球迷嘅士氣。相比邊路,今場球隊嘅中路突破更有威脅,上半場補時階段一次中路突破,佩利錫入球扳平。
🦁🆚🔴門將發威
下半場兩隊維持戰術取態,利記稍有優勢,兩次反擊打身後製造機會,可惜僅僅越位。其後沙拿嘅攻門、文尼連續同沙拿、米拿兩人配合嘅快攻埋門,需要依靠門將文迪嘅撲救力保不失。而車路士亦有一次佩利錫嘅門前機會,被基拿夏神勇救出。

🦁🆚🔴各有調動
70分鐘,兩隊各有調動,車仔以佐真奴入替查洛巴,轉陣成352,加強了中場,而佩利錫轉打右翼衛,增加了右路衝突力。利記連續換入張伯倫同基達,加強進攻火力,亦增加了向前壓迫。其後兩隊整體速率隨體能下降,尾段主要係互相主攻嘅陣地戰。最後兩隊都未能入球,雙方以2-2握手言和,爭標嘅路上兩敗俱傷,被曼城拋離。
🦁🆚🐔控制戰局
下一場比賽,於聯賽盃面對熱刺。面對穩守反擊嘅熱刺,今場杜曹放下了三中堅陣,轉打4222,安排施耶治喺右翼位置拉邊兼且分波。球隊上半場成功控制比賽戰局,半場佔有近七成控球比率,有十次射門,而熱刺一次都未有。不過,車仔左路欠缺進攻球員拉邊,未能拉開對方防線,進攻效果未到最好,球隊因對方失誤同擺烏龍,領先兩球。
🦁🆚🐔對攻
下半場,干地以攻中尼當比利入替左翼衛杜靴迪,轉陣成 4231,而杜曹亦有以雲拿入替夏維斯,加速以同對方對攻。調動之後,兩隊各有進攻效果,熱刺進攻火力明顯加強,而車仔有雲拿入替效果明顯,雲拿提供了更強銳利度以製造機會,可惜未能把握。最終比數維持喺2-0,車仔將帶著兩球優勢,進入周中嘅次回合對決。
🦁總結
車路士面臨傷兵問題,加上兵疲因素,導致近幾場戰績下滑。不過,近兩場大戰一勝一和,加上盧卡古事件得到解決,相信能令球隊站穩陣腳。未來幾場大戰 (包括聯賽盃次回合作客熱刺,英超對曼城同再戰熱刺) ,相當關鍵,眾將需要以意志力應戰。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→