《「地獄賽程」之中, 蘇斯克查如何保住帥位? 》

曼聯於周未作客李斯特城以 4-2 落敗,蘇斯克查下台呼聲愈發強烈,其帥位再次處於危險位置。

今場曼聯如常以4231陣型應戰,派出C朗、般奴、辛祖同格連活爭取入球。不過,面對以三中堅陣3412應戰嘅李斯特城,四人進攻組合嘅火力受到限制。而曼聯嘅雙防中馬迪同普巴,一個年紀大,覆蓋範圍較低,另一個唔擅長擔任防中。陣型中防中人數較少之下,兩人掃蕩力不足,中場多次被打穿,球隊因而未能取得優勢。缺乏足夠防中之下,曼聯後防面對較大壓力,而傷癒復出嘅麥佳亞未有足夠狀態抵擋李城攻勢,最終失誤瀕瀕,球隊慘失四球,格連活射入世界波加上拉舒福特嘅入球亦無補於事。

今場只係「地獄賽程」嘅開始,其後曼聯將要應付連場大戰,包括於歐聯兩次面對阿特蘭大,於英超先後有雙紅會(對利物浦)、大戰熱刺,再有曼市打吡(對曼城)。蘇斯克查或需要作出改變。

👹使用較保守嘅排陣
4231陣型中,四人進攻組合火力強大,但面對速度、技術同抗衡能力相當嘅對手,其火力難以完全發揮(除非前場壓迫力非常強大),因防中較少下,球隊後防容易受壓。

大戰之中,排433/4312甚至三中堅陣或更加適合,蘇斯克查需要考慮變陣。

👹信任輪換球員
變陣之濟,人選自然有所改變,例如三中堅陣可能需要拜利,或者用梳爾打左中堅,而左翼衛需由泰利斯擔任。若果用433,大可以用雲迪碧克。蘇斯克查面對李城時,用狀態不足嘅麥佳亞,拜利卻繼續坐在板凳,令人擔心其用人固執嘅問題日益嚴重。

要變陣,蘇斯克查先要調整用人嘅習性,信任主力以外嘅球員,呢個會係戰績反彈嘅關鍵。跟據往績,當蘇帥面對下台壓力時,往往能帶來驚喜。今次曼聯面對「地獄賽程」嘅成績,以及蘇帥自己嘅帥位,還看其願意相信隊中嘅輪換球員與否。
標籤: 英超  曼聯  蘇斯克查  C朗  般奴  辛祖  格連活  拉舒福特  

留言


請按此登錄後留言。未成為會員? 立即註冊
    快捷鍵:←
    快捷鍵:→