國家打吡丨沙維領軍下巴塞層次豐富 皇馬以強大執行力取勝

西班牙超級盃上演國家打吡,巴塞隆拿同皇家馬德里上演精彩一戰,最終皇馬取勝晉級決賽,巴塞遭遇國家打吡五連敗。

👑反擊打開記錄
今場巴塞係主攻一方,而皇馬比較謹慎,以防反取態應戰。皇馬擅長收縮,防守相當緊密,而反擊相當銳利。上半場中段,皇馬增加向前壓迫,爭取更多反擊機會。25分鐘,賓斯馬突然加速從布斯基斯後方搶到皮球,引領反擊,助雲尼素斯打開記錄。
🔵🔴雙翼齊飛
沙維今場安排巴塞嘅正選陣容中,有丹比利同費倫托利斯雙翼齊飛。上半場巴塞主要從左路進攻,以丹比利、法蘭基迪莊同佐迪艾巴嘅配合為主。而右路嘅費倫托利斯始終剛剛加盟,未有足夠默契下,參與度相對地低。費倫托利斯嘅工作主要係拉右邊同插入禁區接應轉邊嘅高波。巴塞左路組織效果一般,丹比利能以個人突破製造空間,但有時會錯同隊友配合嘅時機,而右路費倫托利斯狀態一般,能插入禁區但最後一傳質素可以更好

🔵🔴高空波嘅選項
雖然巴塞上半場未能以地面組織滲入,但有正箭頭盧克迪莊為球隊提供了打高空波嘅選項,上半場佢嘅頭鎚頗具威脅。41分鐘,一次高空攻勢,盧克迪莊接應長傳做支點俾左路嘅丹比利,丹比利推落底線傳中,盧克迪莊入球追平。
🔵🔴創造力
下半場,沙維連換兩人,以艾斯蘇利入替費倫托利斯,以柏迪入替法蘭基迪莊。巴塞仍有大部分時間處於主攻陣地戰。柏迪嘅入替為球隊帶來創造力,由下半場開始,多次引球推進或插入 halfspace 深入對方陣地製造機會。
👑相似嘅安排,相似嘅效果
皇馬都有面對密集嘅時間,但組織效果不及柏迪在陣嘅巴塞。 下半場中段,安察洛堤以洛迪高入替艾辛斯奧,提高推進速度,亦安排全隊增加向前壓迫,製造更多反擊機會 ( 同上半場中段嘅安排相似 )。皇馬嘅機會隨即增加,先有69分鐘賓斯馬射中柱,3分鐘後另一次攻勢,賓斯馬連續攻門下入球,皇馬再度領先。
🔵🔴前線五人攻堅
皇馬領先後增加收縮防守,而巴塞落後之下,沙維作出調動,以迪比入替加維,以干沙利斯入替丹尼爾艾華斯,球隊陣型變成了325,丹比利、柏迪、迪比、法迪、艾斯蘇利,五人於前線攻堅,火力充足。80分鐘嘅攻勢極具威脅,柏迪插入左路halfspace, 快過出迎嘅門將古圖爾斯一步傳地波到門前,法迪準備射空門之濟,米列圖奧僅僅解圍。不久後嘅角球攻勢,佐迪艾巴傳中助攻法迪頂入再度扳平。之後,雙方再次對攻,希望喺 90分鐘內取勝,巴塞唔止一次中路突破形成機會,但未能取得入球,比賽進入加時。
🔵🔴👑加時階段
加時之中,皇馬以防反為主,巴塞壓上主攻,有威脅但久攻不下。當巴塞壓迫力隨體力下降,皇馬漸漸得到反擊嘅機會,98分鐘,一次四打二嘅反擊,後備上陣而體能充沛嘅華維迪後上射入至勝一球。之後嘅時間巴塞盡力搶攻卻無功而還最後以 2-3 僅負皇馬。
🔵🔴👑總結
沙維回歸巴塞,致力重拾球隊嘅DNA,第一次領軍參與國家打吡,球隊嘅組織能力同銳利度足夠,而且有唔同層次嘅發揮。球隊能同皇馬抗衡,予人驚喜。而皇馬表現一貫地成熟,雖然中場嘅年紀限制咗球隊擴張隊形,向前壓迫嘅時間,但上下半場增加壓迫嘅時候效果顯著,可見球隊嘅執行力。

今場比賽嘅格局同從前熟悉嘅國家打吡非常相似,巴塞以控球同組織能力威脅對方,而皇馬侍機以快攻/反擊入波。小弟個人認為今場係近年最好睇嘅國家打吡,新舊交替之下,老將嘅經驗同年輕球員嘅活力都能為戰局帶來影響,令今場成為高手過招內容相當豐富。

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→