回歸英超成關鍵人物 艾歷臣或成曼聯新重心

臨近季前集訓,曼聯喺增兵方面終有進展,先有左閘馬拉斯亞加盟,再嚟就係傳聞已久嘅基斯甸艾歷臣。

❤️病發後回歸
艾歷臣上年歐國盃心臟病發後,因植入ICD心臟除顫器而未能參與意大利嘅比賽,無奈離開國米。上季無波踢嘅日子,艾歷臣返到自己出道之地阿姆斯特丹,跟隨坦克麾下嘅阿積士操練,到今年1月加盟賓福特。

艾歷臣喺賓福特上陣11場,除初次回歸後備上陣之外,其餘10場踢足,到六月嘅歐國聯一周兩賽亦連踢三場,可見其體能已回復正常。

👍關鍵人物
賓福特行軍速率快,本身速度唔快嘅艾歷臣,跟到節奏之餘,亦好成功咁做到球隊組織嘅樞紐,成為關鍵人物。數據網站Whoscored嘅比賽評分之中,艾歷臣喺英超平均得到7.37分,係全隊最高。有艾歷臣上陣嘅比賽,賓福特11場贏7場,球隊由第17位嘅降班邊緣升上中游位置。


⚽️適合坦克
艾歷臣同般奴類型相似,都係球隊組織嘅重心。唔同嘅係,般奴較多喺禁區頂引領攻勢,而艾歴臣嘅活動泛圍較後,除引領攻勢外,亦會包辦由守轉攻同控制節奏嘅工作。艾歷臣嘅到來,相信有助改善球隊前後嘅連接。踢法而言,佢亦似乎更加適合坦克嘅433結構,倒反般奴或需要更多時間適應。上季喺阿積士嘅日子,相信艾歷臣同坦克或多或少都有互相了解,加上兩人嘅阿積士DNA,可以推斷呢對將帥應該幾夾。從戰術同默契嚟睇,季初艾歷臣分分鐘會踢得多過般奴。

⚽️輪換
若果艾歷臣同般奴同時上陣,球隊組織力定必大大提升,但防守力同對抗強度喺英超恐怕輸蝕,除非球隊有朝一日有曼城同利記等級嘅控制力。長期而言,艾歷臣同般奴相信會輪番擔任正選。小弟個人認為,艾歷臣係相對平衡嘅選擇,面對對方壓迫搶攻時,能將皮球過渡上前,或者以其精準嘅長傳助前線隊友衝擊對方身後嘅空間。般奴會係更加進取嘅人選,面對密集時梳理攻勢,喺禁區頂送直線、到邊路或輔位串連攻勢、以及後上攻門都係佢嘅拿手好戲。

相信喺坦克麾下,艾歷臣會有適合嘅環境去發揮。希望走過鬼門關,依家強勢回歸嘅佢,能夠延續復出後嘅好表現,再創高峰。

歡迎大家支持本文合作夥伴 @redunited.hk
loading

如果喜歡我們的文章,請即分享到︰

標籤: 曼聯  艾歷臣  賓福特  般奴  坦克  英超  

留言


請按此登錄後留言。未成為會員? 立即註冊
    快捷鍵:←
    快捷鍵:→