南美洲 X 歐洲冠軍盃丨阿根廷延續冠軍表現成為「王中王」

相隔29年,南美洲同歐洲冠軍對決再次舉行,阿根廷於溫布萊球場大勝意大利三球。

「王中王」嘅榮譽,或多或少激發球員爭勝嘅決心,使今場戰況激烈,身體碰撞頗多。

阿根廷陣容同美洲盃決賽相似,倒反意大利中前場人腳未算完整。阿根廷組織配合默契更勝對方,加上進攻核心美斯狀態良好,引球帶有魔法,拉都拉唔住,球隊對攻之下得到更多控球。

意大利首先製造到機會,貝拿迪施治右邊斜插入走過對方左閘達利亞費高「盲眼位」,接應長傳入禁區傳中,阿根廷好在有中堅羅美路門前解圍。
今場阿根廷幾次以前場壓迫搶到反擊機會,包括27分鐘嘅前場反擊,美斯轉身扭過迪羅倫素,食住身位推入偏左禁區地波傳中送到門前,拿達路馬天尼斯打開記錄。

完半場前,門將馬天尼斯長傳搵到另一位馬天尼斯,拿達路馬天尼斯學足美斯,轉身推過邦路斯,引球向前到禁區頂,再妙傳俾到迪馬利亞壓過基亞連尼,入禁區笠過當拿隆馬十指關入波,拉開比數至2-0。比起美洲盃決賽對巴西嘅入球,迪馬利亞今次無需要攞高波,但埋門空間更小,更講求細緻度,兩個入球有些少分別但同樣具有級數。
下半場迪馬利亞維持火熱狀態,曾接應美斯角球,轟出一腳禁區外嘅窩利,力道足以入波,只差些少角度。其後美斯多次嘗試入球,但其射門一一被當拿隆馬化解,比賽最後美斯引領反擊助攻迪巴拿錦上添花,令結局對阿根廷而言相當美滿。

今場阿根廷延續美洲盃嘅表現,最終贏波捧盃,相信能再次提升球隊士氣。恭喜阿根廷!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→