利迷隨筆丨利物浦大幅輪換下以驚喜表現反勝修咸頓 曼城煞科戰失分機會微乎其微?

足總杯決賽同車路士激戰120分鐘,三日之後返到英超作客修咸頓,利物浦大幅輪換之下反勝1-2,延續英超爭冠希望。

雙方陣容 :

🔴大幅輪換
面對賽前有10日休息調整時間嘅修咸頓,高普決定大幅輪換9個球員,避免球隊處於體能劣勢,同時盡量俾主力球員休息,一舉兩得。利記正選陣容之中只有中堅干拿迪同門將艾利臣喺足總盃決賽踢足120分鐘,除受傷嘅法賓奴、沙拿、雲迪克外,文尼同阿諾亦唔使隨隊,得以休息。

🔴驚喜表現
球隊大幅輪換之下,場上球員有足夠體能於大部份時間壓住對手。眾將表現俾到球迷唔少驚喜。下半季少有正選嘅南野拓實、艾利洛、鐘斯表現絕不生疏,三人所表現嘅活力,對球隊組織、壓迫等運作幫助唔少。費明奴今場狀態回升,串起前場組織。森美卡斯多次左路出擊,作出四次關鍵傳送,下半場差少少助攻祖達入球。米拿可謂老而彌堅,上半場踢防中多次掃蕩,下半場轉到右閘位置表現良好。高美斯下半季於右閘位置表現進步,可惜今場半場因傷退下火線。馬迪普搭高拿迪嘅中堅組合,今場未有受太大考驗,表現穩定。

整體踢法方面,祖達大部份時間收入中路,連同費明奴、南野拓實、艾利洛、高美斯多次喺右路配合,過程雖未算流水行雲,但效果唔錯,亦得到成果。26分鐘高美斯傳中,對方沙利素頭槌攔截頂空氣,祖達接應分到右邊halfspace南野拓實射近處網頂為球隊扳平。下半場亦有類似機會,祖達回後俾費明奴直接送入右邊halfspace,艾利洛同樣想射近處網頂但稍稍偏離。

🔴運氣因素
至於早段落後同下半場領先嘅兩個入球,分別帶有運氣。列蒙特嘅入球,球權係來自對方中堅利安高對祖達嘅犯規攔截,球證艾堅遜未有吹罰,屬於不幸,加上列蒙特嘅射門係省中米拿再收死艾利臣,利記嘅失球其實係雙重不幸。

球隊喺65分鐘以奧歷治入替艾利洛,2分鐘後嘅角球攻勢便製造到馬迪普嘅幸運頭槌入球。奧歷治雖然無直接參與入球,但再次發揮幸運童子本色為球隊轉運至勝,似乎亦應記一功。

🔴法拉利
今場後備球員上陣帶來驚喜嘅表現,高普賽後形容似係車庫之中仲有架法拉利喺度。其實,今場球隊嘅表現亦要歸功於高普及其團隊嘅訓練,令全體球員能夠保持狀態。

🔴緊咬曼城
利記賽後喺英超繼續緊咬曼城。星期日嘅煞科戰,利記需要擊敗狼隊,同時依靠球隊前隊長謝拉特帶領阿士東維拉令曼城失分,利記先會贏得英超冠軍。

煞科戰賽前,曼城有一整個禮拜休息調整時間,阿士東維拉喺週四晚上仍要面對為護級而戰嘅般尼,就算曼城長期消耗較大,恐怕休息較少而且作客嘅維拉,於煞科戰體能狀態難有優勢。曼城對上6次面對維拉全部贏波,而對上一次連續兩場英超失分,要數到前年嘅2020年十二月。曼城煞科戰失分機會似乎微乎其微。不過,曼城喺今季四大皆空嘅危機下,有可能特別落力,亦有可能特別緊張。

無論如何,一如小弟之前所講,利物浦眾將以至球迷只能抱平常心,撐埋落去!

如果喜歡我們的文章,請即分享到︰

留言


請按此登錄後留言。未成為會員? 立即註冊
    快捷鍵:←
    快捷鍵:→